Shillong, Nailur 03
U Nongïalam ka Liang Pyrshah, u Dr. Mukul Sangma u la kyntu ïa ka Sorkar ban long kaba husiar, bad peitngor bad kaba shimkhia ïa ki jingma kiba lah ban mih bad ban leh eiei halor ki daw kiba pynlong ïa ki samla ban rung sha ki kam lehnoh.
U la buh jingkylli ruh halor ki jingjia ha kaba ïadei bad ka jingwan pyndem jong u Drishti Rajkhowa, u nongïalam barim jong ka United Liberation Front of Asom – ULFA ha South Garo Hills.
U Dr. Sangma haba kren sha ki nongthoh khubor ha ka Sngi Balang u la ong ba watla hashuwa u la kdew ïa ka jingdon jong u Rajkhowa ha Ri-lum Garo, kaba la pynthikna hadien da ka jingwan pyndem, katto-katne ki jingkylli ki dang sah kumto khlem ki jubab.
U la buh jingkylli ruh halor ka jingdon jong ki briew kiba la synran ïa u Rajkhowa ha ka por ba u wan pyndem bad ki bor synshar – hakhmat jong kiba u la wan pyndem.
“Ngi donkam ban kylli ïa ka Sorkar…katno ngut ki khynnah shynrang/rangbah ki don hangta? Hato la khmih lynti ba un don ha ka bynta kaba kyndong tam jong ka ri ha ryngkat bad tang arngut ki nongap pahara shimet jong u. Bad haba u la pyndem noh, kiei ki tiar ki tar kiba u la aiti lait noh tang ki tiar rit? Kumta phi hap ban pynïasoh ïa kiei-kiei baroh bad buh jingkylli ïa ka Sorkar.”
U Dr. Sangma u la kynthoh ruh ïa ka Sorkar, khamtam ïa u Myntri Rangbah ka Jylla, u Conrad K. Sangma, namarba u don hapdeng ka jingkyntait bad ba um shim ïa ka jingkitkhlieh ban pyntikna ïa ka jingsuk kumjuh ban khanglad ïa ka jingmih biang jong ki kam lehnoh ha ka Jylla.
“Kane ka Sorkar la kumno-kumno la tip ba ka don hapdeng ka jingkyntait, khamtam eh u Myntri Rangbah. Kylli ïa kano-kano ka kam. Phi kylli shaphang ka jingtih dewïong, un long uba kloi bha ban kyntait. Hynrei ka jingkitkhlieh jong ka jingsynshar bad ban pynthikna ba ym don kaei-kaei kaba lah ban pynthut pat ïa ka suk ka saiñ bad la kumno-kumno ban wanrah ïa ka jinglong-jingman ka bym itynnad na bynta ka jingkhie biang jong ki kam lehnoh hapoh ka Jylla, baroh ngi hap ban long kiba trei hok ïa la ki jong ki jingkitkhlieh bad ban khanglad ïa ki,” u la pynpaw.
Haba kyntu ïa ka Sorkar ban long kaba husiar, peitngor, bad shimkhia, u Dr. Sangma u la ong, “Haba ngi ïakren shaphang ki jingtip baroh kawei, hato kane ka jingtip kam don ha Ri-lum Khasi-Jaiñtia? Hato ym don jingtip ha Ri-lum Garo? Ka shong ha ka Sorkar ban bishar bniah ïa kita ki jingtip bad pyndonkam ïa ka jingstad jong ki ban poi sha ka jingpynbeit.”
“Ka (Sorkar) dei ban tip kiei ki daw kiba khring ïa ki samla sha ki kam lehnoh, ban thaw ïa ka kynhun lehnoh bad la kumno-kumno ban ïohi ba ngin ym ailad ïa kine kiei-kiei ban kharoi bad ka dei ka kamram jong kita kiba don ha ka bor ha ka Sorkar. Kam pher mano ba la shah bynshet ïa ka jingkitkhlieh hynrei ka dei ka kamram jong kano-kano ka Sorkar ban ïakhun ïa kane ka jait jingeh da ka jingshimkhia kaba khraw, ka jinglong hok kaba janai bad kaba shisha na ka bynta ka bha ka miat jong ki paidbah bad ka Jylla,” bynrap shuh shuh u Dr. Sangma.
