Beijing, Nailur:
U nongialam ka North Korea, u Kim Jong Un u la mih na Pyongyang ban leit sha Beijing, ha ka janmiet jong ka Sngi Nyngkong, ban leit iadon bynta ha ka jingpyni nam ia ka ‘Military Parade’ jong ki shipai kaba pyni ia ka jingkut jong ka Thma-bah ba Ar (World War-II) jong ka pyrthei, ka ban pynpaw ruh ia ka jingiadei hadpeng jong u bad baroh ar tylli ki China bad Russia.
U Kim u la mih da ka rel kaba kyrpang bad un poi ha Beijing ha ka Sngi Balang, ong ka Yonhap da kaba kdew na kawei ka tyllong khubor kaba khlem pynpaw kyrteng.
Kane ka long ka sien leit jngoh ba nyngkong ia utei u nongïalam ka North Korea shabar ri naduh ba u la leit sha Russia ha u snem 2023 naka bynta ban ïakren bad u President ka Russia u Vladimir Putin bad ka long ruh ka jingleit kaba nyngkong eh jong u sha China naduh u Kyllalyngkot jong u snem 2019. Ha China pat, la khmih lynti ba u Kim un peit ïa ka jingïaid parade ban kynmaw burom ïa ka jingdap 80 snem jong ka jingkut noh jong ka thma bah, ha ryngkat ka jingiadon lang jong u President jong ka China, u Xi Jinping.
Ka China ka la long ka nongkyrshan ba kongsan jong ka North Korea la bun snem, kaba la iarap ban kyntiew ïa ka ïoh- ka kot jongka ban ïaid beit katba ka US bad kiba bun ki paralok jongka, ki dang pynneh ïa ki jingpynjari pyrshah ia ka North Korea halor ki prokram nuclear jongka. Hynrei hadien ka jingsniew noh jong ka jingiadei bad ka US bad kumjuh ruh bad kiwei pat ki ri jong ka pyrthei namar ki prokram nuclear jong ka North Korea, u Kim u la nang iajan pat sa bad u nongialam jong ka Russia- u Vladimir Putin. Ki heh jong ka US bad ka South Korea, ki kynnoh ruh ba dei ka North Korea kaba la pynbiang ia ki tiar thma bad kumjuh ruh kaba la phah shipai sha Russia ban ai jingkyrshan ia ka thma jong ka Russia pyrshah ia ka Ukraine.
Ka jingmih jong u Kim ryngkat bad u Putin bad u Xi, ka long ban pynpaw ïa ka jingïadei kaba nang kham skhem shuh-shuh hapdeng jong kine ki 3 ngut ki nongïalam bad ban pyni ïa ka jingkwah na ka liang jongki ban ïatreilang khamtam haba iadei bad ki kyndon bad ki jingpyrkhing jong ka pyrthei ba la ïalam da ka US. Na ka bynta u Kim, katei ka jingleit, ka kyntiew ïa ka kyrdan synshar jong ka North Korea, kaba la ailad ïa u ban ioh ban iajan bad katto- katne ki nongïalam ba donbor tam ha ka pyrthei.
U Kim bad u Xi kim shym pat la ïakynduh markhmat naduh u bnai Kyllalyngkot jong utei u 2019 ba ki la iakynduh khatduh eh, ha kaba u nongïalam ka China u la leit jngoh ïa ka North Korea bad dawa ruh ba dei ban pynduh noh ïa ki tiar nuclear ha Korean Peninsula. Ha shwa jong kane, u Kim u la leit shabar ri kumba 4 sien ha ki 10 bnai ba la leit tang ban leit wad jingkyrshan na ka China ban wanrah biang ïa ka jingïadei hapdeng ka North Korea bad ka US, kumjuh ruh bad ka South Korea.
Ha ka sngi shwa ba un mih noh, u Kim u la jurip ïa kawei ka karkhana shna namding missile kaba thymmai, la iathuh ki lad pathai khubor jong ka North Korea ha ka Sngi Nyngkong, kaba kdew ia ka jinglah jong ka North Korea ban shna tiar thma wat ha ki khyllip mat hashwa katei ka jingleit jong utei u nongialam shabar ri.
Ka rel kaba rem dor bad kaba lah ban ïada na ki kuli, kaba u Kim u shong sha China, ha ka histori, ka la long ka rukom leit jingleit kaba ki nongïalam jong ka North Korea, ki sngewtynnad bha, kynthup ïa u kpa bad u kpa tymmen jong u Kim.
U Kim, u la leit ruh da ka rel sha Russia naka bynta ka jingialang jong u bad u Putin ha ki 2 snem ba la leit. Ha shwa jong kane, u la ïaid lynti ruh haduh kumba 60 kynta sha Vietnam ban ïakynduh ïa u President Donald Trump ha ka samoi treikam ba nyngkong jong u na ka bynta ka jingïalang bah ha Hanoi. U Kim, u la kiew ha ka liengsuiñ Boeing 747, kaba la pynbiang da ka China, ha ka por ba u la ïakynduh ïa u Trump ha ka sien kaba nyngkong ha u snem 2018 ha Singapore.
