Shillong, Nailur 03
Ka hat-trick ba la ïoh da u Supang Lemba Khongwir ka la biang pura ïa ka kynhun ïalehkai ka Mylliem SC ban khur ïa ka lai point kaba nyngkong jong ka ha ka Shillong Premier League 2025, hadien ba ka la pynliem noh ïa ka Malki SC da 3-0 kol ha ka sngi Balang ha SSA Stadium kaba ha First Ground, Polo.
Watla ha ka kylla step ka la shu kut shwa khlem da don ba lah ban pynkhih jar, pynban haba la wan ban bteng pat ïa ka kylla miet, u Alem u la ïoh ban thep ïa kine ki lai tylli ki kol kiba la wan ha ka minit kaba 55, 64 bad 70 minit, kiba long artad ki kol, kiba ithiang ban peit, kaba kylla long artad ka hat-trick kol kaba nyngkong ba utei u rangïalehkai un ïoh ban thep ha kane ka samoi ïalehkai jong ka SPL.
Kumban shu pynkynmaw, kine ki artylli ki klob, ki dei kiba la kiew kyrdan na ka First Division, ha kaba ka Malki ka long kum ka lahduh, katba ka Mylliem ka la wan ha ka kyrdan ba-ar.
Haba wan ban bteng ïa ka kylla miet, ka rukom ïalehkai ka la noh sha ka Mylliem, ha kaba lai ngut ki rangïalehkai jong ka ba kynthup ïa u Remark Kharmalki, Shaibor Nongrum bad Alem Khongwir, ki la kyntiew ïa ka rukom ïalehkai jong ki bad ban buh jingeh ïa ka Malki SC.
Ka kol ba nyngkong ba u Alem u la ïoh ban thep ka la wan lyngba ka bol kaba la ïarap ban pynbuh sha u da u Shaibor bad marsien ïoh ïa kane ka bol, wut u la rah sted shakhmat bad ha ka khyllipmat kaba biang u la ïoh ban shut kham jam ban pynkhih ïa ka jar.
Shiphew minit hadien kane, ka Mylliem ka la ïoh ba kan shut ïa ka corner lyngba u Remark ha kaba ka bol ka la poi hajan jong u Alem uba la don lypa marjan ha ka kol, u la ïoh ban pyndei da ka khlieh ïa ka bol, bad ka kol kaba lai ka la wan hadien ba u Alem, u la mareh sted shakhmat bad ban tehlakam ïa ka bol bad ha ka khyllipmat kaba biang sa shisien u la ïoh ban khyrwit bad ban pynkhih jar.
Da kane ka jingjop, ka pynlong ïa ka Mylliem SC ba kan kiew sha ka kyrdan kaba san, katba na ka liang ka Malki SC, kane ka nam rem ka la pynlong ïa ka ban don ha ka jingma ha kaba ka lah ban shah pynhiar kyrdan.
Ha ka sngi Palei kan dei ka jingïakhun kaba nyngkong jong ka kylla kaba saw (Rd 4) hapdeng ka Rangdajied United FC pyrshah ïa ka Nangkiew Irat SC ha ka por 4:30 nohphai sngi.
