Shillong, Nailur 03
Hadien ka jingïoh ïa ka jingbit bad ïa ka Letter of Permission (LOP) na ka National Medical Com-mission (NMC) ka Shil-long Medical College (SMC) kala pynkhreh ban sdang noh ïa ka jingai jinghikai naduh ka taïew ba khatduh jong u bnai Nailur, 2025.
Haba pynbna ïa kane ha ka sngi Balang, ka Myntri ka Koit ka Khiah ka Kong Ampareen Lyngdoh ka la ong, “Kane ka sngi kan dei ka sngi kaba kmen ïa ka tnat ka koit ka khiah bad kumjuh ïa ka Sorkar Meghalaya namar ngi la ïoh pdiang ïa ka Letter of Permission na ka NMC kaba la kynthup ïa ka SMC kum kawei na ki college kaba la ïoh ïa ka jingmynjur ban sdang treikam noh ïa ka samoi pule jong u snem 2025-26 na ka bynta 50 ngut ki samla pule”.
“Mynta ngi dang pynkhreh ban sdang noh ïa ka jinghikai. Ngi la pynkhreh ban sdang noh ha ka taïew ba khatduh jong u Nailur. Kane ka dei ka por kaba la buh ha ka ri India baroh kawei na ka bynta kito ki samla kiba la pyndep ïa ka NEET. Ngi dap ruh da ka jingkmen ban pyntip ba ki samla pule kiba don ïa ka jingangnud bad kiba la pyndep ki lah ban aplai na ka bynta ban ïoh pule MBBS katkum ka jingbhah ïa ka Meghalaya ha ryngkat bad ka jingïasyllok bad ka SMC,” ong ka Myntri bad pyntip ba ka wat ba-ar jong ka jingïasyllok na ka bynta ka Seat MBBS kan sdang ha ka 26 tarik u Nailur.
Da kane ka jinglong jingman, ka Meghalaya mynta kala ïoh baroh 144 tylli ki seat pule MBBS, kaba kynthup ïa 50 tylli ha SMC bad 94 tylli ki seat kiba la mang ha kiwei pat ki jaka pule kiba don shabar ka jylla kum ha NEIGRIHMS bad RIIMS.
Ka Kong Ampareen ka la ong ba kane kan wanrah ïa ka jingkylla kaba khraw ïa ka jylla Meghalaya, bad bynrap, “Ki samla pule ki jong ngi kiba don jingthrang ban pule ïa ka MBBS kila don ïa ki kabu kiba biang bha. Hooid, kaba kham kongsan ïa ki samla pule ki jong ngi ka long ba kin hap ban treikam hapoh jong ka jylla Meghalaya kumta kan long ka jingïarap ha ka ban weng ïa ka jingduna jong ka jingdon ki doctor ha ki jaka ai jingsumar jong ka Sorkar hapoh ka jylla”.
Ka la pyntip ba ka SMC ka dei ka “brown field project” bad kan pyndonkam ïa ki hospital kiba la don lypa kum ka Shillong Civil Hospital bad Ganesh Das Hospital, kum ki hospital ban ai jinghikai, ban weng ïa ka jingdonkam ban tei ïa ka hospital kiba thymmai.
Ka college ka don ïa ka jingthmu ban sdang ïa ka Specialization Courses ha ki snem ban wan, ban ai ïa ka kabu ban kiew ha ka kam kum ki doctor ha ka jingai jingshakri ïa ka Sorkar.
Ka Kong Ampareen kala pynpaw ruh ïa ka jingskhem jingmut ba ka college kan lah ban ai ïa ka jinghikai kaba bha tam ha ka liang ka koit ka khiah hynrei kan shim por pat ban poi sha ki kyrdan kiba hakhmat, ka SMC ka ïengskhem ha kaban pynthikna ban ai ïa ka jinghikai bad ka jingsumar ïa ki nongpang.
Ka SMC kala pynkhreh ban sdang da katto katne ngut ki nonghikai, ka Myntri kala ong ba kila don 8 ngut na ki 16 ngut ki Professor kiba donkam, 17 ngut na ki 20 ngut ki Associate Professors, 21 ngut na ka 23 ngut ki Senior Residents bad 12 ngut na ka 15 ngut ki Tutor bad Demonstrators bad baroh 25 ngut ki Assistant Professor kiba donkam kila don.
Ka Myntri kala pynpaw ba kane ka jingduna namar ka jingeh ban khring ïa ki Professor sha ka jylla kum ka Meghalaya bad kala ban jur ïa ka jingdonkam ban don ïa ka jingsiew kaba heh bad ban pynbiang ïa ki jingdonkam.
“Ngin sa ïaid shakhmat na ka bynta ban pynkhlaiñ ïa ki jingduna kiba dang sah. Ïa ka jylla kaba kum ka Meghalaya, ka Shillong kam dei satia ka jaka kaba don sha jngai bah, ka long kaba eh ban pynbiang ïa baroh kitei ki post namar ba ngi hap ban don ka jingsiew kaba heh bad ka jingpynbiang ïa ki jingdonkam kiba bun ïa ki professor,” kala ong bad ka bynrap “Kumta ban wanrah ïa ki, ka dei ka jingtynjuh kaba khraw bad dei halor kane ba ngi sngewnguh bha ïa ka kynhun jong ki ophisar bad ka jingtuklar jong u Myntri Rangbah ban pynthikna ba kin don ïa ki jingdonkam kiba kongsan ha ka kam ai jinghikai ha ka khyllipmat kaba nyngkong”.
Ka Myntri kala pynithuh ruh ïa ka Dr. Nicola Gracyl Lyngdoh Iangrai, ENT Surgeon kaba la shemphang bha na ka RIIMS, kum ka Director jong ka Shillong Medical College. Ka Dr Iangrai kala pynpaw ïa ka jingkloi ka jong ka ban shakri ïa ka jylla bad ban noh synñiang ban pynlong ïa ka medical college kaba jop.
Ka Myntri kala pynthikna ba ka ‘Medical Seat’ kaba la bhah da ka Sorkar India yn ym pynduh noh mardor, namar katto katne ki seat ki lah ban dei shi bynta jong ka bhah jong ka jylla.
Halor ka jingkylli, ka Myntri kala pynshai ba ka Tura Medical College ka dei da kawei pat ka sobjek, ka ‘greenfield project’ kaba donkam ïa ka ïing building bad ïa ki tiar ki tar kiba thymmai, ym kum ka SMC kaba dei ka ‘brownfield project’ ka ban pyndonkam da ki hospital kiba la don lypa.
Ka Myntri kala pyntip ba u Myntri Rangbah u dang ïakren bad u Myntri Rangbahduh ka ri u Narendra Modi ban plie ïa kane ka Medical College kaba nyngkong eh hapoh ka jylla.
Ka jingsiew kaba shi snem ba la buh kan long T.30,000. “Ngi la buh ha ka dor kaba rit bha kaba T.30,000 kynthup ïa ka bai Hostel kaba manla ka snem,” kala bynrap.
