Shillong, Nailur 03
Ki nongdie madan ha Khyndailad kiba la shah pynkynriah ha jaka ïeng kali ha MUDA, ki la ïathuh ba kham mynshwa haba ki shong die madan harud surok ha Khyndailad ki la kamai 2000 tyngka haduh 3000 tyngka shi sngi hynrei mynta pat kaba bun eh ba ki kamai ka dei 1200 tyngka shi sngi.
Na ka liang kine ki nongshong die madan ki la kyntu ïa ki paidbah ba kin ïa wan ban rung sha katei ka ïew bad ki dei ruh ban da ïarap ban thied.
Haba ïakren bad ki katto katne ki nongshong die madan ha ka 3 tarik Nailur, 2025 kiba la kynriah sha jaka ïeng kali ha MUDA ki la ïathuh ba ka ïew ka shongshit bad ka shngaiñ tang ha kato ka por ba dang shu sdang shong ha katei ka jaka namar ki briew ki wan peit kai ban ïohi ïa ka ïew thymmai hynrei mynta pat ka la kynjah.
Ki la ïathuh ruh ba ha MUDA ki lah ban die tang 5 ne 6 tylli ki jaiñ ha la ka jong ka jong ka sngi. Ki la ïathuh ruh ba ka ïew ka biang bha tang ha ka sngi Saitjaiñ. Kawei ka longkmie ka la ïathuh ba ka ïew ha katei ka jaka ka long kumba ap hospital namar bun ba ki shu shongkai. Shuh shuh ki la ïathuh ba ka jingkamai ka la ïapher ha ka por ba ki dang shong harud surok namar kiba ïaid lynti ruh haba ki ïohi ïa ki tiar ki kylli bad ki thied lada ki itynnad.
