Nongstoiñ, Nailur 03
Ka Hima Nongmynsaw Syiemship hapoh ka jing -ïalam u Bah Phlowing Syiem Nongbah, Syiem ka Hima Nongmynsaw Syiemship ryngkat ka jingïasynranlang u Bah Johnes Sohshang Secre-tary ka Hima Nongmyn-saw, ki Sordar Shnong ka thaiñ khappud bad kiwei kiwei ha ka sngi Balang jong ka taïew ki la leit ban ïakynduh ïa u Deputy Commissioner (DC) ka West Khasi Hills District ban pynsngew ïa ka sur u paid nongshong shnong ka Hima Nongmynsaw halor ka rai ka jong ki ban beh krad beit ïa ki nong Assam lada ki dang wan biang ban shna surok ha katei ka thaiñ.
Shuh shuh na ka liang ka Hima halor katei ka rai kala ai ruh ïa ka jingthoh sha u Deputy Commissioner ka West Khasi Hills District bad kala pynpaw ruh ba ki donkam kyrkieh ban pynbeit shuwa ïa u pud u sam lym kumta kim donkam ïa ka roi ka par ne kino kino ki jingdonkam namar ka jingpynbeit ïa u pud u sam ka dei ka mat kaba hakhmat eh na ki jingdonkam kiba kham kongsan.
U Bah Trasdinglan Nonglang, Sordar ka shnong Mawsikar kum u nongaiktien ka Hima Nongmynsaw Syiemship haba ai jingkren sha ki nongthoh khubor u la ong ba ka Sorkar Assam kam ju burom markylliang ïa ka jylla Meghalaya ha kaba lada ki mut ban pyntyllun ïa kino kino ki projek ha ki bynta ki thaiñ khappud Meghalaya bad Assam ha ka thaiñ Langpih ter ter man ka por kam ju kynjoh ktien kaba ïadei ruh katkum ka soskular hynrei ka shu wan leh donbor beit.
Shuh shuh u la ong ruh ba ha kane ka kynti wad lada kin da kynjoh ktien ruh, ka Hima hi kan ym sngap satia hynrei kan pyrshah bad ki paidbah katei ka thaiñ kin beh krad beit, da kaba u la bynrap ba ka Hima ka kwah ban pynbeit shwa ïa u pud u sam, keiñ noh ka roi ka par.
