Shillong, Nailur 03
U Novak Djokovic u la lah ban nangpynskhem na ka bynta ban kynjoh sha ka nam lahduh ha America hadien ba u la lah ban pynliem noh ïa u Taylor Fritz ha ka sien kaba khadwei bad ban jam sha ka semi final jong ka US Open 2025.
Ha kane ka jingïakhun, u Djokovic u la jop da 6-3, 7-5, 3-6, 6-4 ha ka jingïakhun semi final para mawei jong ki shynrang ha ka quarter final kaba la long ha Arthur Ashe Stadium bad un ïakynduh semi final pyrshah ïa u Carlos Alcaraz.
Watla um shym la lah ban jop ha ka Slam ha kine ki ar snem ba la dep bad u la shim bynta tang khyndiat ha kane ka aïom, hynrei une u khlur ïalehkai ba 38 snem ka rta u la lah ban jam sha ka semi final ha baroh saw tylli ki lympung ïalehkai kiba heh mynta u snem 2025. Hynrei um shym la lah ban jam sha ka phainal ha kitei ki lympung.
Te kumta une u khlur ïalehkai na Serbia u la khmih lynti ban pynkut noh ïa ki jingbym lah ban pynurlong ha kine ki khyndiat snem ha kane ka lympung ha New York, bad u la khmih lynti ruh ban pynliem ïa u Alcaraz.
Ha ka jingïakren bad ki nongthoh khubor hadien ba u la pynjlan ïa ka rekod ïakhun pyrshah ïa u Taylor Fritz sha ka 11-0, u Djokovic u la ong ba u thmu ban pynkhyllem ïa u Jannik Sinner bad u Alcaraz ha Flushing Meadows. Hadien ba ki la ïasam lang ïa ki hynriew tylli ki Slam ba la dep, u Alcaraz bad u Sinner ki don ka jingkyrmen ba ki lah ban ïakynduh ha ka final. Ka jingïakhun kaba lai jong ki ban ïakhun ïa ka nam lahduh jong ka Grand Slam mynta u snem ka dei hadien ka Roland Garros bad ka Wimbledon.
“Ngim donkam ban pynlut por shaphang arngut na ki”, la ong u Djokovic. “Ngi tip ba ki dei ki nongïalehkai ba kynsai tam ha ka pyrthei.”
“Baroh ki lah ban khmih lynti ïa ka jingïalehkai phainal hapdeng kitei ki arngut. Ngan pyrshang ban pynthud ïa ki jingthmu jong kiba bun ki briew.”
