Shillong, Nailur 03
Ka kynhun ki nongïakura jong ka ri India kin pynkhreh ban ïatynjuh bor pyrshah ïa ki nongïakura ba kynsai ka pyrthei ha ka World Boxing Championships ka ban sdang naduh ka sngi Palei ha Liverpool.
Kane ka long ka sien kaba nyngkong, ïa kane ka lympung ïakura jong ka pyrthei ba yn pynlong na ka bynta ki nongïakura kynthei bad shynrang.
Kumba ka paw ka India ka la lah ban ïalehkai bha ha u snem 2023, ha kaba ka kynhun ki kynthei ka la khur saw tylli ki takma ksiar ha New Delhi bad ki shynrang ki la khur lai tylli ki takma rnong ha Tashkent.
Hynrei hadien utei u snem ka India ka la sdang ban hiar ha kaba kam shym la lah ban ïalehkai bha ha ki jingïalehkai ha Asia bad kumjuh ka jingbym lah ban khur takma ha ka Paris Olympic ha u snem 2024.
Watla ki nongïalehkai jong ka ri ki la wanphai biang da ki jingjop ha ka World Boxing Cup ha kaba sdang jong u snem, hynrei ka jingdon palat 550 ngut ki nongïakura na palat 65 tylli ki ri, kynthup ïa palat 17 ngut kiba la ïashim bynta ha ka Paris Olympic, ka lah ban buh jingeh bha ïa ka India.
Ka Nikhat Zareen, kaba la bat ar sien kum ka lahduh ha ka pyrthei bad ka Lovlina Borgohain, kaba la khur takma rnong ha Tokyo Olympic, ki la wanphai biang sha kane ka lympung ïalehkai shabar ri, hadien shisnem tam ba ki la sangeh ïalehkai.
Baroh arngut ki la rung sha kane ka lympung da kaba pynkhreh tang khyndiat por, namar ba ki la ïakhun tang ha kawei ka lympung hapoh ka ri naduh ka jingïalehkai ha Paris.
Hynrei kine ki arngut ki lah ban shah pynïakap na ka bynta ban ïakynduh pyrshah ïa ki nongïakura ba kynsai ha kaba sdang jong ka jingïakhun hadien ba ki la duh ïalehkai baroh lai tylli ki jingïakhun ha ka World Boxing Cup mynta u snem.
Ka Nikhat kan sdang ïa ka jingïalehkai ba thymmai ha ka jingkhia kaba 51kg, hadien ba ka la jop mynshwa ïa ka nam lahduh ha ka pyrthei ha ka 52kg bad 50kg. Katei ka nongïakura kaba na Telangana ka la ïakhun ha ka Paris Olympic, ha kaba ka la shah rem noh tang ha ka wat kaba ar hadien ba ka la shah rem noh ha ka ‘thei ïakura kaba na China ka Wu Yu. Ka Lovlina, kaba la jop lypa lai sien ha ka pyrthei, kan ïalehkai ban ïada na ka bynta ban khur biang ïa ka jingjop ha ka 75kg. Hynrei ma ka ruh kan hap ban ïaid lyngba ïa ki katto katne da kaba kan hap ban ïakynduh pyrshah ïa kiba rim bad kumjuh kiba thymmai kiba long kiba kynsai ka pyrthei.
Nalor kitei ki ar ngut, ka Pooja Rani kaba la bat ar sien kum ka nongjop ha ka Asian Championship kaba la khur ïa ka takma rupa ha ka World Cup ha u Naitung, ka la don lang hapoh kane ka kynhun jong ki kynthei.
Ki kyrteng ki ‘thei ïakura jong ka ri ki long ka Meenakshi Hooda, Nikhat Zareen, Sakshi, Jaismine Lamboria, Sanju Khatri, Neeraj Phogat, Sanamacha Chanu, Lovlina Borgohain, Pooja Rani bad ka Nupur Sheoran. Katba ha ka liang ki shynrang ki ong u Jadumani Singh Mandengbam, Pawan Bartwal, Sachin Siwach, Abhinash Jamwal, Hitesh Gulia, Sumit Kundu, Lakshya Chaha , Jugnoo Ahlawat, Harsh Chaudhary bad u Narender Berwal.
