Shillong, Nailur 04
Ki shipai Border Secu-rity Force (BSF) ki la hap ban kawang da u ‘Chili Grenade bad Stun Grenade’ sha ka kynhun jong ki runar na Bangladesh kiba thmu pynïaid shakhmat ïa ka kam khaïi tuh masi.
Katkum ka khubor na ki pulit la ong ba u Osman Ali jong ka C-Coy, BSF, BOP Ryngku ha East Khasi Hills u la ai ka jingujor sha ki pulit ba ha ka 2 tarik mynta u bnai, ha ka por kumba 2.05 dang step, ki shipai BSF ki la lap ïa ka jingïaid jong ka kynhun ki runar kaba don kumba 40 ne 50 ngut na liang jong ka Bangladesh bad kumba 20 ne 30 ngut na ka liang jong ka India ha ryngkat bad ki masi hajan jong ka khappud ha wah Khasimara ha East Khasi Hills.
La ong ba halor ka jingïohi bad ïaleh ban ïakhun, kitei ki runar ki la sdang ban kawang da ki maw sha ki shipai BSF, bad kane ka la pynlong ïa ki shipai BSF ban kawang uwei u’chili grenade’bad uwei u ‘stun grenade’.
Hynrei la ong ba na ka liang jong kitei ki kynhun runar ki la bteng ban kawang sha ki shipai BSF bad ha ka jingïaleh bad pynphai, na ka liang jong ki shipai BSF ki la siat haduh lai sien na ka PAG bad haduh khatsan sien na ka rifles ka jong ki. Dei halor kane, ba kine ki runar ki la phet krad sha ka liang jong ka Bangladesh.
Hadien ba ki la phet, kham hadien na ka liang jong ki shipai BSF ki la ïoh ban kurup ïa saw tylli ki masi bad kawei ka wait na katei ka jaka.
