Shillong, Nailur 04
Ka Pandit Jawaharlal Nehru Stadium kaba ha Margao, Goa ka la ïoh ïa ka jingmynjur na ka bynta ban pynlong ïa ka jingïalehkai ka wat ba khatduh jong ka AFC Asian Cup 2027 (Final Round Qualifiers) ha ka Group-C hapdeng ka India bad ka Singapore ka ban long ha ka 14 tarik u Risaw mynta u snem.
Kane ka la wan hadien ba ka Sree Kanteerava Stadium kaba ha Bengaluru ka la shah kyntait noh ha ka AFC na ka daw ka jingbym biang ban pynlong ïa katei ka lympung. Te kumta dang shen ki la paw ar tylli ki jaka kata ka Pandit Jawaharlal Nehru Stadium kaba ha Goa bad ka Jawaharlal Nehru Stadium kaba ha Shillong ki ban shah jied ban pynlong ïa katei ka lympung. Hynrei ha kaba kut ka Goa ka la shah jied ban pynlong ïa katei ka lympung.
Kane ka kynhun ïalehkai (Senior) jong ka ri kan ïakhun arsien pyrshah ïa ka Singapore ha ka FIFA International Window, ha kaba ka jingïakhun kaba nyngkong kan long ha National Stadium kaba ha Singapore ha ka 9 tarik u Risaw bad hadien kine ki kynhun kin leit sha Goa na ka bynta ka wat kaba ar.
Kane kan dei ka jingïalehkai kaba 17 ba ka kynhun ïalehkai (senior) jong ka ri kan ïakhun ha Goa, bad ka dei kaba nyngkong eh naduh u snem 2017 ha kaba ka India ka la ïakhaid mar 2-2 kol bad ka Myanmar ha ka Asian Cup Qualifiers. Ka India mynshwa ka la ïakhun pyrshah ïa ka Singapore ha Goa ha kaba ka la jop da 1-0 kol ha u snem 2004. Haba kheiñ kyllum ka India ka la jop san sien, ïakhaid san sien bad shah rem hynriew sien ha Goa.
Mynta ka India ka don ha ka kyrdan ba ha trai duh ha ka Group-C jong ka AFC Asian Cup 2027 Qualifiers Final Round da kaba ïoh tang shi poiñ na ki ar tylli ki jingïakhun. Hadien ki jingïakhun ha u bnai Risaw pyrshah ïa ka Singapore, ka India kan ïakhun pyrshah ïa ka Bangladesh ha Dhaka (18 tarik u Naiwieng) bad ïa ka Hong Kong ha la ïing (31 tarik u Lber, 2026). Ki kynhun kiba jop ha kane ka group kin ïoh rung sha ka AFC Asian Cup Saudi Arabia 2027.
