Shillong, Nailur 04
U Myntri Rangbah ka Jylla u Conrad K Sangma ha ka sngi Palei u la ïakynduh ïa u Myntri ka tnat Kam Pohïing ka Sorkar Pdeng u Amit Shah na ka bynta ban phah tuklar ban pynsted ïa ka jingpyntreikam ïa ka Inner line Permit (ILP) ban khanglad ïa ka jingwan buhai shnong beaiñ bad wan rung na Bangladesh lyngba ki khappud jong ka Jylla Meghalaya.
U Conrad u la kyrpad ruh ban thaw kyrpang ïa ka Meghalaya Cadre, ban pynrung ïa ka ktien Khasi bad Garo ha ka Khyrnit kaba phra jong ka riti synshar ka ri bad ban ai kyrteng ïa kawei na ki surok ha Delhi ha ka kyrteng jong u Purno Agitok Sangma (bam kwai ha dwar U Blei).
U Myntri Rangbah u la ong ba ka ïingdorbar thawaiñ ka jylla ka la dep ban mynjur ïa ka resolution bad ki la ai ruh bun tylli ki dorkhas sha ka Sorkar Pdeng na ka bynta ban pyntreikam noh ïa ka ILP hapoh Meghalaya.
“Nga la pynkynmaw sa shisien ïa u Myntri ka tnat Kam Pohïing, khamtam eh da kaba buh ha ka jingmut ïa ka jinglong jingman kaba mynta ha khappud bad ki jait jingjia bapher bapher kiba jia ha ka ri ba marjan. Da kaba buh kine baroh ki bynta ha ka jingmut jingpyrkhat, ka long kaba donkam ym tang ban pynkhlaiñ ïa ka jingdon jong ki bor pahara ha lynter ki khappud, ka jingtei ïa kiba bun ki jingeh hynrei ban don ruh ki lad ki lynti ban peitngor ïa ka rung ka mih bad ki briew ba nabar shapoh ka Meghalaya bad haba peit ïa ka jinglong jingman kaba mynta bad ki aiñ kiba don ha ka ri, ka lynti kaba ngi don ka dei beit ban leit da ka ILP bad namar kane, ngi kyntu sa shisien ïa u Myntri ka tnat Kam Pohïing ban pyrkhat bad ai noh,” la ong u Conrad.
U Conrad u la pynkynmaw biang ïa ka jingkyrpad jong ka jylla kaba la slem bha ban ithuh ïa ka ktien Khasi bad Garo bad ong, “Nga la pynkynmaw sa shisien ïa u Amit Shah ba ngi la mynjur ïa ka rai ha kaba ïadei bad kane ha Assembly bad bun sien, ngi la aiti ïa ka dorkhas sha u da kaba kyntu ïa u ban pyrkhat ban pynrung ïa ka ktien Khasi bad ka ktien Garo ha ka Khyrnit kaba Phra.”
Halor ka jingtyrwa ban pynïakhlad ïa ka rukom pynïasoh lang ïa ki joint cadre bad ka Assam, u Conrad u la ong, “Kumba phi la tip mynta hi ngi don ïa ka joint cadre jong ka Meghalaya-Assam bad ym don kiwei pat ki jylla ha ka ri kiba don joint cadre bad namarkata, nga la kyrpad bad kyntu ïa u Myntri Kam Pohïing ba lada lah ban pynïakhlad noh ïa ki cadre ka Assam bad ka Meghalaya ruh kan ïoh noh la ka jong ka cadre, kan long shisha ka jingmyntoi kaba khraw ïa ka jylla Meghalaya.”
Shuh shuh, u Conrad u la kyrpad ba dei ban ai kyrteng ïa kawei ka surok ha New Delhi ha ka kyrteng jong u PA Sangma uba la khlad noh da kaba kdew ïa ki jingnoh synñiang jong u sha ka thaiñ shatei lam-mihngi bad sha ki rit paid.
