Shillong, Nailur 04
U Nongïalam ka BJP uba dei ruh u Myntri ka Sorkar Jylla u Bah AL Hek u la ïathuh lypa ba ka seng kan jop haduh 20-30 ngut ki MLA ha ka ilekshon sha ka ïingdorbar thawaiñ ka jylla ka ban sa wan.
“Ngi don ka jinglah ban jop haduh 20-30 tylli ki konstitwensi ha ka ilekshon sha ka ïingdorbar thawaiñ ban wan”, ong u Bah Hek haba kren sha ki nongthoh khubor ha ka sngi Palei.
Hynrei u Bah Hek u la pynpaw ba ha kaba ïadei bad ka jinglong jingman ha Meghalaya, ka jingmih ruh kan shong shibun eh ha ka jinglong jong ki kyrtong, ym tang ha ka jingkhlaiñ jong ka seng.
U Bah Hek u la kyntait ruh halor ka jingpynpaw jong ka jingbym don ki kyrtong kiba biang bad paka ban rung sha ka BJP, da kaba ong, “Kumno phin ong ba ki kyrtong kiba tbit bad paka bha kim wan sha ka BJP? Kum u (L) Bah TH Rangad, u la long u kyrtong uba tbit jong ka BJP. Ngi pdiang sngewbha ïa baroh. Ka por kan long ka nongpynkhiah kaba khraw, bad ka por kan sa ïathuh ïa ngi.”
Halor ka ilekshon GHADC ban wan, u Bah Hek u la pynpaw ka jingngeit skhem ba ka jingtrei shitom jong ka seng na ka bynta ki paidbah kan ïoh ïa ka jingshaniah jong ki.
U la ong ruh ba ka jingpyrshang jong ka seng jong u ha baroh shisnem ka la long kaba kongsan bha ban pynkhlaiñ ïa ka jingdon jong ka.
“Ka BJP ka dei kawei na ki seng saiñpyrthei kaba trei baroh arphew saw kynta,” ong u Bah Hek, da kaba pynpaw ïa ka jingaiti jong ka seng ban ïai ïakynduh bad ki paidbah bad ban trei na ka bynta ka jingbha jingmiat jong ki.
U Bah Hek u la kam ba baroh ki seng saiñpyrthei ki ïakynduh jingeh ha ka ban lum ïa ka jingkyrshan paidbah. “Kam dei ka kam kaba suk ban ïoh ïa ka jingkyrshan kaba jur na ki paidbah,” u la ong haba pynskhem ïa ka jingdonkam ban ïai bteng ban ïatreilang bad ki paidbah.
Ha kaba ïadei bad ki jingjia pyrshah Khristan dang shen, u Bah Hek u la pynshai ba ki don ki seng kiba lah ban donkti, hynrei ka social media bunsien ka thaw bad kynnoh ïa ka BJP.
“Lada phi kylli ïa nga kum u riew saiñpyrthei, ka dei namar ba kam dei kaba la leh beit beit da ka BJP, balei kan ktah ïa ka BJP?, lada ka BJP kam shym la leh eiei kaba bakla ïa kano kano ka jaidbynriew ne ïa ki niam Khristan, Hindu, Muslim ne kano kano ka jingngeit, bad lada ka BJP ka donkti beit, kumta nga lah ban ong ïa phi, hooid kan ktah ïa ka BJP.”
Ha kaba ïadei bad u MDC jong ka Tura u Bernard N Marak uba pan jingïarap na ki nongïalam kiba nabar ka jylla, u Bah Hek u la ong ba um ïohi ban don ka jingeh bad kata ka bynta. “Kam don jingbakla ban pan jingïarap na uno uno u briew,” u la ong bad bynrap ba ka jingwad jingïarap ka la dei ka bynta kaba ju don ha ka saiñpyrthei.
