Shillong, Nailur 04
Ka Kong Ampareen Lyngdoh kaba dei ka Myntri Sorkar ka la jaw ki ummat kmen mar ïa poi ha ïing bad ïakynduh ïa ki hynmen bad para hadien ba ka la ïoh ïa ka khubor ba ka ïingbishar Meghalaya High Court ka la pynkut noh ïa ka mukotduma kynnoh tah sia lieh da kaba rai pynksan da kaba ong ba ym shym la don satia ki jingpynshisha ne ki sakhi ba ka donkti ha ka kam jyrsieh thung kam nonghikai.
Mar ïa poi ha ïing, ki nongkyrshan jong ka bad ki bahaïing ha sem ki la ïa kdup da ka jingkmen ba ka ïingbishar kala pynkut noh ïa ka mukotduma naba ym don ïa ki jingpynshisha ba ka donkti ha ka jingkynnoh ba thung kam beaiñ bad tah sia lieh.
Ka Kong Ampareen haba kren sha ki lad pathai khubor ha kane ka sngi ka la pynpaw ïa ka jingsngewnguh ïa U Blei Trai Kynrad uba la pyllait na kane ka jingshah kynnoh kaba la neh 17 snem.
“Katno phi la pynmong bad pynsngewsih ïa nga, phi la kren beiñ ïa nga hynrei ngan duwai ba U Blei un ai ka bor ban map ïa phi baroh. Ym ban buhnud ne buh khong,” la ong ba Kong Ampareen bad ong ruh “I Mei bad u hynmen jong nga kim ïoh sngew shuh ïa kane ka rai ka ïingbishar hynrei kin kmen bad ïohi ha bneng ba ngam shym la don bynta eiei ha kine ki kam sniew kiba la shah kynnoh.”
Ka Kong Ampareen kala ai jingïaroh ïa ka hukum bala pynmih da ka ïingbishar Meghalaya High Court ba pyllait noh ïa ka na ki jingkynnoh leh bym hok ha ka kam thungkam Assistant Teacher ki skul Lower Primary bala ïaid mukotduma la 17 snem.
Ka Kong Ampareen kala pynpaw ïa ka jingsngew laitluid bad jingsngewnguh da kaba ong “Bun bah ka um hakhrum jong ka jingkieng. Nga la shah ktah jur bha ha kine ki 17 snem bala leit”.
“Mynta nga kynmaw ïa i Mei bala khlad noh, Nga ong ïa I Mei ba nga khlem leh hynrei ila shah pynbor khlem sangeh, im don shuh hangne ban lehkmen ïa kane ka sngi ba sngewtynnad. Nga kynmaw ïa u hynmen bala khlad noh Bah RG Lyngdoh, uba wat hapdeng kiei kiei, u ju ïai ong ïa nga ba lada phim shym la leh, phi dei ban ïai bteng ban shakri ïa u paidbah”.
Ka Kong Ampareen kala ai khublei ïa ki bahaïing hasem, ki nongkyrshan, ka kynhun ki nongïasaid aiñ, kynthup u Senior Advocate Salman Khurshid, kiba la ïeng ha syndah jong ka ha baroh kine ki jingjia.
“Ka hukum ba mynta ka sngi ka pynskhem ïa ka nongrim jong ngi. Ka kyrteng u Bah Peter G Marbaniang kam shym la shah pynjah burom ha kano kano ka rukom. Ngi dei ka longïing ba bat ïa ka jingleh hok bad ka jingshakri kat kaba lah ïa u paidbah ka Jylla” ong ka Kong Ampareen.
“Nga ai khublei ïa U Blei bad ïa ka Balang Catholic lem bad ki Lyngdoh Niam kiba ïai bteng ban duwai lem na ka bynta jong nga,” kala ong.
