Shillong, Nailur 04
Ka Jaintia Students’ Union (JSU) ha ka 04 tarik u Nailur 2025, ka la leit ban aiti ïa ka dorkhas ha u Lat ka Jylla, u CH Vijayashankar ban dawa ïa u ban ïakren bad ka Sorkar Pdeng bad Sorkar Jylla, ha ka ban pynbna ïa ka Jowai kum ka Summer Capital ka Jylla, ban pyntreikam noh mardor ïa ka Inner Line Permit (ILP) bad ban shong bishar bniah biang ïa ka Instrument of Accession (IOA) ba ïasoi ha ka 17 tarik Nailur, 1948.
Ka JSU ka la ong “Ngi dawa ban pynbna ïa ka Jowai kum ka Summer Capital ka Meghalaya, ka ban ïaid lang bad ka jingïakren halor ka Tura kum ka Winter Capital (kaba dang shong bishar da ka All Party Committee 2025)”.
Ka la ong ruh ba ka jingpynbna ïa ka Jowai kum ka Summer Capital kan kyntiew ïa ka jinglong mar ryngkat jong ki jaitbynriew, kan kyntiew ïa ka jingkynshew, bad kan kyntiew ïa ka kam jngohkai pyrthei ha ka thaiñ. Ki kdew ruh ïa ka jinglong tynrai jong ka Jowai, ka jinglong ba la pynkhreh ha ka liang ka jingsynshar, bad ki jingdonkam ha ka roi ka par kum ki daw ba kongsan kiba kyrshan ïa ka jingtyrwa.
Ka JSU ka la kyrpad ruh na u Lat ban tuklar ha kaban pynkloi noh ïa ka jingpyntreikam ïa ka ILP ha Meghalaya, kaba la sah teng naduh ba ka Ïingdorbar Thaw Aiñ ka Jylla ka la mynjur ïa ka resolution ha u snem 2019.
“Ka ILP kan tehlakam ïa ka jingrung kyrthep ki briew ba nabar, kan ai jingïada ïa ka jinghiar pateng ka khyndew ka shyiap bad ka kolshor jong ki jaidbynriew trai ri ha ri-lum Jaintia” la ong ka seng.
Nalorkata, ka JSU ka la kyntu ban bishar biang ïa ka Instrument of Accession (IOA) ban pynkhlaiñ ïa ka jingïada ïa ki jaka ba hap hapoh ka Sixth Schedule bad pynthikna ïa ka jinglaitluid ki trai riewlum. Ki la kam ba ka IOA ka kular ïa ka jingsynshar hi ki trai riewlum halor ka khyndew ka shyiap bad ka riti dustur, hynrei ka jingkyntur pud ka donkam ban hap pynskhem biang ha ri-lum Jaintia.
