Shillong, Nailur 04
Uwei u nongïalam lynti ïa ki nongjngohkai pyrthei sha ki thaiñ Sohra, u Bah Gilbert Khongsit uba dei ruh u President ka Tour Guide Association of Meghalaya, Sohra Unit u la pyntip ba la antad malu mala ba ki kali na Assam kiba kit ïa ki nongjngohkai pyrthei sha ki thaiñ Sohra ka long beit kumba 500 tylli ha ka shi sngi bad ha ka sngi Saitjaiñ bad sngi u Blei ka dang bun shuh shuh.
Haba ïakren lyngba ka phone, u Bah Gilbert u la pynpaw ba ka jingdawa jong ka All Khasi Meghalaya Tourist Taxi Association ka long kaba biang bha ban kit da ki kali kiba na Meghalaya ban kit ïa ki nongjngohkai pyrthei sha ki jaka jngohkai pyrthei namar ka long shngaiñ ïa ki ruh.
U la pynkynmaw ba ha kine ki sngi ki nongjngohkai pyrthei ki la bret jaboh ha ki thaiñ Sohra hynrei lada kit da ki taksi kamai kiba dei ki trai jylla yn lah ban tehlakam ïa ka khuid ka suba ruh.
Shuh shuh u la pynpaw ba ïa mynta shi por ka jylla kam pat lah ban pynbiang ïa ki kali ban kit ïa ki nongjngohkai pyrthei hynrei ka Sorkar ka dei ban shimkhia ban lah pynbiang suki suki.
U la ong ba ha kawei ka bynta kan ktah ïa ka jylla namar lada ïa ki nongjngohkai pyrthei yn pynhiar noh shiteng lynti.
Shuh shuh u la pynpaw ba ki nongjngohkai ki ju wankai da ki kali ba rem kum ki Innova bad kiwei de, kaba shongdor haduh 4500 tyngka shisngi lada shim wai na Shillong sha Sohra hynrei lada ym lah pynbiang, kan pynthait ïa ki nongjngohkai ban wankai.
Kumban shu pynkynmaw ka All Khasi Meghalaya Tourist Taxi Association ka la pyntip ba ha ka 16 tarik mynta u bnai kin khang ïa ki kali kiba wan nabar ka jylla ban kit ïa ki nongjngohkai pyrthei sha ki jaka jngohkai pyrthei.
