Tura, Nailur 04
Ka jingïalang paidbah ba la khot pynlong da ka Non Gazetted Employees Association ha nongbah Tura ka la long ka jingïakhih ka ba heh ha kaba la wan ïashim bynta da palat 7000 ngut ki paidbah ban pyni ïa ka jingtylli ha ka jingïakhih ki nongtrei.
Ka jingïakhih ka NGEA halor ka jingbym pat ïoh tulop ba 44 bnai ki nongtrei ka GHADC bad ka jingïakhih kaba la ïaid arbnai mynta bad lyngba kane ka jingïakhih ki la dawa ban siew noh shuwa 12 bnai ka tulop jong ki na ka 42 bnai ba dei ban siew ïa ki, hynrei ka jingsngap jar ka EC ba la ïalam da ka NPP mynta ka la nangpynbitar shuh shuh bad ka ba pynlong ïa ki ban dawa siew khuid noh baroh ki jingsiew jong ki.
Ki MDC ka liang pyrshah kiba na ka TMC bad BJP ki la ai ka jingkyrshan mynta hadien ba la artaïew ka jingïakhih ki khlem don bynta. Ki seng bapher bapher na Ri Lum Garo kum ka GSU, FKJGP,ADE, AHAM, AYWO, FAF bad kiwei ki la wan ban ïasohlang ha kane ka jingïakhih, ha ryngkat kiwei de ki jingdawa kiba dang sah teng.
Ka jingïakhih ka la sdang na ka phyllaw jong ka ophis ka GHADC ba ka NGEA ba pynlong ïa ka jingïakhih, la pynlong ka jingïaid ïa ka sor bah Tura bad wanphai pat ha ka jaka ïakhih, ki nongïakhih ki la pyrta ban dawa pynim ïa ka Council bad pynrem ïa u CEM bad u Dy CEM.
Ki dkhot ka NGEA ki la pynpaw ba kin nym pdiang ïa ka jingtyrwa ka EC ban siew noh 5 bnai ka tulop ïa ki nongtrei bad ki nongïakhih ki pynpaw ba kin ïai bteng ban ïakhih katba ki jingdawa jong ki kim pat urlong.
“Ngin ïai bteng ka jingïakhih jong ngi bad ngi thmu ruh ban pyntip ïa ka jingïakhih jong ngi sha ka President ka ri, u Myntri rangbah duh ka ri bad kumjuh ruh sha ka sorkar India halor ka jinglong jingman kaba ngi ïakynduh. Katba ka sorkar kam pat ai ka jingkular da ka jingthoh ban siew noh ïa ka tulop jong ngi naduh u bnai Naiwieng” la ong u Timtim M Sangma.
“Ngi im ha ka jingim kaba kum ka dujok. Ka jinglong jingman jong ngi ka long ka ba eh shaba palat bad ngin ym shongthait tad haduh ba la pyndep ïa ka jingsiew jong ngi kaba ngi dei hok ban ïoh”.
