New Delhi, Nailur:
Ka India ha ka Sngi Ba-ar, ka la ioh ban pynpoi haduh 21 ton ki lad jingïarap sha Afghanistan, kum shi bynta ban ai jingïarap ia katei ka ri kaba la shah ktah ha u jumai uba jur ha ki khyndiat sngi ba la leit.
Namar la ong ba palat 1,400 ngut ki briew, ki la duh ei noh ia ka jingim bad kumba 2,500 tam kiba la mynsaw ha ka thaiñ East jong ka Afghanistan hadien ba u jumai uba haduh 6.0 Magnitude ka jingkhlaiñ, u la pynkhynñiuh ia katei ka ri ha ka Sngi U Blei.
Kumta, la ong ba kitei ki lad jingïarap ba la phah da ka India, ki dei kiba la shu pynpoi da ki liengsuiñ ba kyrpang jong ka India.
U Myntri ka tnat kam bar ri, u S.Jaishankar, u la iathuh ba ka India ha katei ka sngi, ka la ioh ban phah haduh 21 ton ki mar jingiarap kynthup ia ki jaiñkup, ki ïingjaiñ, ki tiar pynkhuid, ki top buh um, ki generator, ki tiar shet jingshet, ki tiar pynkhuid um ba lah ban rah, ki jaiñ thiah, ki dawai – dashin bad kiwei de, ki ban iarap ia ki ha ka jingdonkam jongki ba man la ka sngi.
“Ka India kan dang bteng ban buddien ia ka jinglong jingman ha madan bad kan phah shuh shuh ia ki jingiarap ha ki sngi ban wan,” la ong utei u Myntri kam bar ri ka India haba ai jingkren ha katei ka sngi.
U Myntri Rangbah-duh ka India, u Narendra Modi, haba ai jingkren sha ki nongthoh khubor ha ka Sngi Nyngkong, u la ong ba ka India ka kloi ban ai ka kti- ka mon ka diang bad ban ialeh ban phah ia baroh ki lad jingiarap kat kiba ka lah ban ai sha kito kiba la shah ktah jur ha utei u jumai ha Afghanistan.
