Agartala, Nailur:
Ka seng BJP ha Tripura ka la pynlong ïa ka jingïakhih kaba jur ha Agartala ha ka 1 tarik Nailur, da kaba pynrem ïa ki jingkren pynjah burom ba la kynnoh ba la kren da ki nongïalam ka RJD bad ka Congress pyrshah ïa ka kmie jong u Narendra Modi, Myntri Rangbahduh ka ri, kaba la khlad noh.
Ka seng ka la kynnoh ruh ba ka CPI(M)-Congress ka la ïalam bakla ïa ki briew lyngba ka jingpynbna ba bakla kaba dang ïaibteng pyrshah ïa ka sorkar BJP.
Ha kane ka jingïakhih ba la ïalam da u President ka seng ha ka jylla uba dei ruh u MP ka Rajya Sabha u Rajib Bhattacharya, la ïashim bynta da u Myntri ka tnat Transport and Tourism Sushanta Chowdhury, u Myntri ka tnad SC Welfare bad ARDD u Sudhangshu Das, u Myntri ka tnad Industries and Commerce u Santana Chakma, u General Secretary ka BJP u Amit Rakshit, Secretary Devid Debbarma, ki MLA bad kiwei pat ki heh nongïalam.
Ki nongïakhih kham hadien ki la pynlong ïa ka dharna habar jong ka Pradesh Congress Bhawan.
U Bhattacharya u la ong, “Baroh ki tip ba ha Darbhanga jong ka Bihar, u Rahul Gandhi jong ka Congress, uba trei ban pynjot ïa la ka jong ka seng, bad u nongïalam ka RJD, u Tejashwi Yadav, ki la pyndonkam da ki ktien kiba kren beiñ ïa ka kmie ba la khlad noh jong u Modi. Ngi la pynrem jur halor kane, ha kane ka jingïakhih, ngi la pynlong ïa kane ka jingïaid paidbah.”
U Sushanta Chowdhury, u la kynnoh ba ki liang pyrshah, ki pynsaphriang ïa ki khubor lamler, pyrshah ïa ka sorkar.
“Ha kine ki khyndiat sngi, ka CPI(M) bad ka Congress ki la pynsaphriang ïa ka jingthombor pyrshah ïa ka BJP bad ïa u Myntri Rangbahduh ka ri, kynthup ha kane ka jylla jong ngi, ki trei pyrshah ïa ka sorkar jong ngi da kaba pynsaphriang ïa ki khubor bakla bad ïalam bakla ïa ki paidbah da ki jingkren lamler”, u la ong.
U Chowdhury u la kam shuh shuh ba ki paidbah ka Tripura ki la kyntait ïa ka “saiñ pyrthei ba jakhlia” da kaba jied ïa ka BJP.
“Man u snem ha ka por ilekshon, ka Congress ka ju kynnoh thok halor ka jingkylla sorkar bad ka ïalehkai da ka Fixed Match pyrshah ïa ka CPI(M). Hynrei ki paidbah ka Tripura ki pynkylla ïa ka sorkar namar ba ki don ka jingshaniah ha ka BJP. Kane ka sorkar ka long kaba kut jingmut ban shakri ïa baroh ki bynta jong ka imlang-sahlang,” u la bynrap.
Ka BJP ka la pynpaw biang ba kan dang ïai bteng ban pyrshah ïa kaei kaba ka la khot “ka jingpynbna ba sniew” na ki liang pyrshah katba ka dang pynleit jingmut ha ka roi ka par bad ka synshar khadar ha ka jylla.
