Shillong, Nailur 04
Ka tnat ïalehkai jong ka Sorkar Jylla kan sa shong jingïalang bad ki bor ba dei khmih jong ka Mawtneng U.P & Secondary School hadien ba kane ka skul ka la shah weng na ka jingshim bynta ha ka Under-15 Boys jong ka 64th International Subroto Mukherjee Football Cup 2025 kaba la long ha Bengaluru.
Kane ka jingshah weng ka la wan hadien ba ki bor pynïaid jong ka Subroto Cup ki la lap ba ki la don haduh saw ngut ki khynnah katei ka skul kiba la palat ïa ka rta ba la buh.
Kat kum ka jingpynpaw da uwei u ophisar katei ka tnat, la ong ba kane ka dei ka sien kaba nyngkong ban ngat ha katei ka jingjia bad kaba la wanrah ka jingjah burom ïa ka Jylla hi baroh kawei. La ïathuh ba ïa katei ka jingïalang yn sa shong shen ha kane ka nongbah na ka bynta ban lap ïa ki jingshisha baroh.
Kumba ka paw kane ka lympung mynta u snem ka la long kaba kham pyrkhing bha ïa ki rta jong ki khynnah bad hashwa ban pynlong ïa kane ka lympung la pynlong shwa da ka jingpynrung kyrteng lyngba ka online na ka bynta ban bishar bniah ïa ki kot ki sla jong ki khynnah ha kaba ïadei bad ki rta jong ki.
Napeng ki 34 tylli ki kynhun, ki la don haduh 21 tylli ki kynhun na kylleng jong ka ri India kiba la shah weng shi syndon na kane ka lympung tang namar ka jingbym lah ban shim khia da ki bor Sorkar ha ka ban bishar bniah ïa ki rta jong ki khynnah. Kine ki kynthup na Manipur, Air Force School, Army Boy Coy, Assam, CBSE, Chattisgarh, Dadra and Nagar Haveli and Daman and Diu (DNH&DD), Delhi, Goa, Kerala, Maharashtra, Megha -laya, NCC, Sainik School, Sikkim, Telangana, Tripura, Uttar Pradesh, Uttarakhand bad na Sri Lanka.
Lah ban kdew ba ha u snem ba la lah, ka Jylla ka la mad ha kajuh ka jingeh ha kaba kam shym la ïoh ban shim bynta ha ka Sub-Junior Boys’ National Football Championship (Tier 1) hadien ba ki bor pynïaid jong ka All India Football Federation (AIFF) ki la lap ba ki don napdeng ki khynnah kiba la ïaw rta.
