Shillong, Nailur 04
Ka Nangkiew Irat SC ki la lah ban pynïakhaid mar 1-1 kol pyrshah ïa ka Rangdajied United FC ha ka lympung ïalehkai Shillong Premier League ha ka sngi Palei kaba ha long ha SSA Stadium kaba ha First Ground, Polo.
Kane ka la wan urlong lyngba ka shi kol ba la thep da u Wallamsuk Nongkhlaw (66) hadien ba u Manbhakupar Ïawphniaw (23) u la pynkhih jar nyng-kong na ka bynta ka Rangdajied.
Ka jiingiakhun hapdeng kine ki ar kynhun ka la kham pynbun kam bha ïa u rephri u Bah P. Mawthoh, ba pynïaid ïa kane ka jingïakhun, ha kaba la don ruh ki khep, ba un sei beit beit da ki yellow card kum shi bynta ban tem ïa ka sur ïalehkai kaba khluit bha jong ki rangïalehkai na baroh ar kynhun ha madan, tad haduh ba u la hap ruh ba un da sei wat da ka red-card ïa u rangïalehkai ka Nangkiew Irat bad kumjuh ïa u coach ka Rangdajied, kaba lehse ka ban ktah bha ïa baroh ar ki kynhun ha ki jingïakhun ki ban wan.
U Stephanson Pale arsien arwat u la lah ban tynjuh borbah ïa u rangapkol ka Nangkiew u Surjay Kumar Pariyar tang hapoh ki 15 minit ba la sdang ka jingïakhun, hadien kane sa uwei pat u rangïalehkai, kampher wat lada um shym la rung satia ka kyrteng ha ka thup kyrteng ki nongthep kol, pynban u Micky Marweiñ, u dei u nam tam na bynta ka Rangdajied, uba la pynpaw shynna ïa kata ka buit ka sap bad jingtbit ïalehkai jong u, namar dei lyngba jong u ba ka pynlong ïa u Manbha ba un ïoh ban thep ïa ka kol, kaba dei artad kaba 50 jong kane ka lympung ïakhun mynta ka samoi.
Haba wan ban bteng ïa ka kylla miet, u Wallamsuk u la wan mih na ka ben shong bad mih plie ha ka jaka jong u Raikutshisha Buam bad marsien ïa rung, u la lah ban pynkhih win ïa ka kut jong ka Rangdajied, kaba pynlong ïa ka Nangkiew Irat ba kan ïoh ïa ka kabu ba kan shut ïa ka corner, kaba hangne ka bol ka la hap beit ha kut ka 6 yard ha kaba u Kerichard L. Marshillong rangapkol ka Rangdajied um shim la lah ban kem bha ïa ka bol, kaba hangne u Wallamsuk uba la don kham hajan u la ïoh ban shut ïa kane ka bol kaba la rung beit sha kol.
Te kumta ka Nangkiew Irat ka la ïai long kum ka kynhun ka bym shym la mad satia ïa kane ka nam rem ha kane ka lympung watla kam shym la lah ban khur jingjop. Te kumta ka Nangkiew Irat ka la ïoh ban khur 10 poiñ na ki saw sien ïakhun, katba ka Rangdajied ka la ïoh 5 poiñ.
