Shillong, Nailur 05
U Myntri ka tnad pule-puthi, u Rakkam A. Sangma u la kular ba ka Sorkar Jylla ka dang wad bad khmih bniah ïa ki jingtyrwa ban pynkiew ïa ka tulop jong ki nonghikai ynda ka jinglong-jingman ha ka liang ka pisa-tyngka ka la skhem bad manbha.
Kane ka jingkren jong u ka long hadien ba ka Federation of Adhoc School Teachers of Meghalaya (FASTOM) dang shen ka la pynbna ïa ka rai jong ka ban mih sha surok bad ban ïakhih pyrshah halor ka jingbym lah jong ka Sorkar Jylla ban kyntiew ïa ka tulop jong ki nonghikai Adhoc hapoh ka Jylla.
Haba jubab ïa kane, u Sangma ha ka Sngi Thohdieng u la ong sha ki nongthoh khubor ba ka Sorkar Jylla kam don bynta ban siew beit ïa ka tulop jong ki nonghikai ha ki skul ‘Grant-in-Aid’.
Katkum ka jingong jong u, ïa kitei ki skul la seng da ki School Managing Committee (SMC), kiba long trai ïa ki ïingmala bad kiba thung ruh ïa ki nonghikai.
“Ka Sorkar ka ai jingkyrshan ‘Grant-in-Aid’ na ka bynta ka tulop jong ki nonghikai, hynrei ki SMC ki don ruh ka jingkitkhlieh ban rai halor ka rukom siew tulop sha ki…ka dei ruh ka kamram jong ki SMC ban pynkiew ne ban siew ïa ka tulop jong ki,” u la pynpaw.
“Hynrei, ynda ka jinglong-jingman ha ka liang ka pisa-tyngka ka long kaba skhem, tikna, ka Sorkar ka dang wad bad khmih bniah ïa ka jingtyrwa ban pynkiew ïa ka tulop. Kane ka dei ka jingdawa jong baroh ki jait kyrdan nonghikai ha kylleng ka Jylla. Lada ngi rai na ka bynta ki ‘Adhoc’, ka SSA ruh ka don 14,000 – 15,000 ngut ki nonghikai, kumta kam long kaba lah ban rai shisien rai haba buh jingmut ïa ka jinglong-jingman ha ka liang ka pisa-tyngka jong ka Sorkar,” bynrap biang u Sangma.
Haba kyrpad ïa ka FASTOM ban ym ïaid shakhmat bad ka jingthmu ïakhih jong ki, u Myntri u la ong, “Namarba ka Sorkar ka dang wad ki lad ki lynti kumno ban kyrshan ïa ki. Lada ka jinglong-jingman ha ka liang ka pisa-tyngka ka la nang manbha, tikna ba ka Sorkar ka dang wad bad khmih bniah ïa ka jingtyrwa jong ki nonghikai.”
