Khliehriat, Nailur 05
Ka Public Hearing ne ka jingpynsngew paidbah ba la pynlong da ka Meghalaya State Pollution Control Board (MSPCB) ha ka 5 tarik Nailur halor ka jingthmu jong ka M/S Meghalaya Cements Limited (Topcem Cement) ban tih mawshun ha Mooiong-Thlusniang, Chiehruphi ha ka jaka kaba heh 26.5 Hectare, ka la long kaba ïaid beit ïaid ryntih haduh kaba kut ka jingïalang.
Baroh ki nongshong shnong bad nongïalam shnong ka thaiñ Narpuh ki ai ka jingkyrshan kaba pura halor kane ka jingthmu jong ka Topcem khamtam ki lai shnong kiba don marjan bad ka Topcem ba kynthup ka Chiehruphi, Thangskai bad Wahiajer Narpuh, lait noh tang ka KSU hi marwei kaba ïeng ban pyrshah.
Ha kane ka public hearing, la don 12 ngut kiba la ai jingkren ha rynsan, kynthup kiba kyrshan bad pyrshah.
Na ka liang u Doloi jong ka Elaka Narpuh, Bah Manbha Kyndoh u la ai ka jingkyrshan ïa ka Topcem ha kane ka jingthmu ban khlong ïa u mawshun na katei ka par kaba don ha Chiehruphi.
Kumjuh u Waheh shnong Chiehruphi, Bah Stingson Siangshai, Waheh shnong Thangskai, Bah Phaibiang Syrti, Waheh shnong Wahiajer, Bah Banjop Suting nalor u Secretary ka Elaka Narpuh Bah Sibren Sumer, bad u Executive Member Elaka Narpuh, Bah Desous Pohshna nalor kiwei kiwei kiba la pynpaw ïa ka jingmut ba ki ai jingkyrshan ïa ka Topcem halor ka nongrim ba ka wanrah ïa ki jingmyntoi bad jingkyrkhu hapoh ki shnong ki thaw khamtam ha kino kino ki kam kiba iadei bad ka imlang ka sahlang.
U Secretary ka Elaka Narpuh, Bah Sibren Sumer, ula ong ba kiba bun ki Elaka hapoh ka District kim don ia u mar pohkhyndew kumba don hapoh ka Elaka Narpuh bad kane ka long ka jingkyrkhu bah ia ka Elaka da ka jingwan ki company.
Ha kaba ïadei bad ka ïoh kam ïoh jam, une u Secretary ka Elaka ula pyntip ba kumba long mynta kane ka company ka ai kam ai jam 18 tylli ki post ha ka shisnem na ka bynta ki lai shnong.
Baroh ki nongkyrshan ki kyntu ïa ka sorkar ban pynkloi ban ai ‘Clearance’ khnang ba ka company kan ioh ban tih bad pyntrei noh ia kane ka par.
Napdeng ki 12 ngut ki nongkren tang ka Khasi Student Union (KSU), East Jaiñtia Hills District hi kaba pyrshah ïa kane ka par tih mawshun.
U General Secretary ka KSU East Jaintia Hills District, u Bah Kwill Suchiang ula ong haduh kane ka khyllipmat ka KSU ka ïeng pyrshah namar ba ka mariang kam long shuh kaba bit ban shong ban sah.
Ula ong ka khyndew ka shyiap hapoh ka thaiñ Elaka Narpuh ka la kylla long ka kam ‘business’ ym shuh ka khyndew ka shyiap kaba long ban shong ban sah. Haba ngi kren kumta kam mut ba ngi shun, bishni ne kynnoh ïano ïano hynrei ngi pyrkhat na ka bynta ka pateng ban sa wan kaei ka ban jia ïa ki.
Ngi sngewthuh ba kane ka jingpynsngew paidbah kan jop da kaba suk mynta ka sngi, hynrei watla katta na ka liang ka KSU ula ong ba kan ïai pynpaw ïa ki jingma kiba ap lypa ïa ka Elaka Narpuh bad ki shnong kiba pdiang ïa kane ka par.
Ïa ka jingialang la pynïaid da ka Additional Deputy Commissioner, East Jaiñtia Hills District ka Kong JU Kharpuri, ha ka jingdonlang u Environmental Engineer na ka Meghalaya State Pollution Control Board u Bah Y. Frankie Laloo, u Environmental Engineer ka MSPCB Bah James Lamurong bad kiwei de ki ophisar.
U Environmental Engineer ka Meghalaya State Pollution Control Board Bah Y. Frankie Laloo hadien ba la wai ka jingpynsngew paidbah ula ong ïa ka kaiphod jong kane ka jingïalang bad ki shithi ba phah da ki riew shimet bad kynhun sengbhalang kiba don 840 tylli yn phah sha ka State Environmental Impact Assessment Authority (SEIAA) kaba don ha Shillong ban shim ïa ka jingbishar.
