Mawkyrwat, Nailur 05
Ka Hynniewtrep Integrated Territorial Organisation (HITO), South West Khasi Hills District hapoh ka jingïalam u samla Bitnam Nongsiej, Working President ryngkat ki dkhot ha ka miet jong ka 4 tarik u Nailur 2025 ka la leit ban khynra drok ha ki kyndong kynshrot jong ka Ïew Mawkyrwat bad ha kane ka jingkhynra, ka seng ka la ïoh ban bat haduh kumba 12 ngut ki nongdih drok.
Ka seng ha kane ka jingkhynra ka la ïoh ruh ban kurup ïa ki nar injek kiba pyndonkam ha ryngkat ki drok ba la song bha kumjuh ruh ïa u kynja.
Ka seng hadien ba ka la dep tohkit ka la thang noh ïa kine tiar ba la ïoh ban kurup.
U samla Bitnam Nongsiej haba kren sha ki lad pathai khubor u la ong ba ka seng kan ym shongthait hynrei kan nang ïai khynra ïa ki nongdih drok kumjuh ruh ïa nongdie kum shibynta ban rat dyngkhong ïa une u jingdih ba sniew hapoh ka dong ka thaiñ.
