New Delhi, Nailur:
Ha ka sienjam kaba khlem da pynslem, ka Sorkar India, ka la khang pyrshah noh ïa ka account X (mynshwa ka Twitter) jong u riew shemphang ha ka liang ka ioh- ka kot jong ka ri Austria, u Gunther Fehlinger Jahn, hadien ba u la pynmih ïa ka khubor kaba la wanrah jingïakynad, ba la dawa ia ka India ba ka dei ban pyn-um ia ka India ryngkat bad ka map jong ka Khalistan.
U Fehlinger-Jahn u la thoh kumne: “Nga khot lang ia baroh ki ri ka pyrthei ban iatrei lang ban pynpra ia ka India sha ka ExIndia. U @narendramodi u dei u briew jong ka Russia. Ngi donkam ia ki paralok jong ka jinglaitluid na ka bynta ka @KhalistanNet.”
Ka tnat kam poh-ïing jong ka Ri India bad ka tnat Electronics & Information Technology ka la buh-dak ia katei ka jingthoh kaba la saphriang paidbah bha bad la bthah ia ki bor pyniaid ka rynsan X ban khang noh syndon ia katei ka account na ka bynta ki nongpyndonkam na India. Naduh katei ka por la pynsangeh ia katei ka account ha India. U Fehlinger-Jahn u shakri kum u President jong ka Austria Committee na ka bynta ka jinglong dkhot jong ka NATO jong ka Ukraine, Kosovo, Bosnia, bad Austria. U iadon bynta ruh ha ka board jong ka kynhun treikam naka bynta ka jingpyn-ïasoh ia ka ioh- ka kot jong ki ri Balkan ba Shathie.
U Myntri Rangbah-duh ka India, u Narendra Modi, ha u Naitung 2024, u dei u Myntri Rangbahduh ba nyngkong jong ka India, ban leit jngoh ia ka Austria hadien 41 snem. Kane ka jingleit ba kyrpang ka iadei ruh bad ka jingdap 75 snem jong ka jingïadei hapdeng ka India bad ka Austria.
