Nongpoh, Nailur 05
Kumba long ha shityllup ka ri, ka jingrakhe ïaka sngi ba kyrpang jong ki nonghikai lane ka ‘Teacher’s Day’ la pynlong ruh ha Ri Bhoi District da ka ophis jong u District School Education Officer (DSEO) bad ka ophis jong u Sub-Divisional School Education Officer. Ïa kane ka jingrakhe la pynlong ha Parish Hall jong ka skul St. Paul’s Higher Secondary School, Nongpoh.
Ha kane ka jingrakhe, u MLA jong ka Mawhati konstitwensi, u Bah Charles Marngar u la long kum u kongsan, u Deputy Commissioner ka Ri Bhoi, u Abhilash Baranwal kum u symbud kongsan nalor ka jingdon ryngkat jong u DSEO, Bah Savio B Blah, ka Joint Director of School Education and Literacy Kong D Hujon lem bad kiwei kiwei de ki ophisar, ki nonghikai bad ki khynnah pule na ki skul bapher bapher.
Ki lai ngut ki nonghikai kiba la ioh ïa ka khusnam District Awards ha kane ka sngi ki kynthup ïa ka Kong Streamlet Khongwir, Assistant Teacher jong ka Nehru Memorial Higher Secondary School Umsning ha kyrdan jong ki Secondary Level, u Roshan Pokhrel Headmaster jong ka Nepali Government School, Nongpoh ha ka kyrdan Upper Primary Level bad u Bah Jesful Wahlang, Head Teacher jong ka Center Village Government Lower Primary School, Jirang ha ka kyrdan Lower Primary Level.
Haba ai jingkren ha kane ka sngi, u Deputy Commissioner ka Ri Bhoi, u Abhilash Baranwal u la pynpaw ba ki nonghikai ki don ïa ka bynta kaba kongsan bha ha ka imlang ka sahlang ban tei bad pynwandur ïa ka lawei jong ki khynnah pule. U la ong ruh ba ymtang ba ki pynsaphriang jingstad lyngba ki kot, hynrei ki nonghikai ki ai ruh ïa ki jinghikai ïa ki khynnah pule ba kin pynkhreh kumno ba kin long ki briew kiba don jingkitkhlieh ha ka imlang ka sahlang.
U Baranwal, u la kyntu ruh ïa khynnah pule ba ki dei ban don barabor ïa ka mynsiem sngewnguh ïa la ki jong ki nonghikai, da kaba bynrap ba kane kan ai mynsiem bad pynshlur ruh ïa ki nonghkai ba kin lah ban trei kham bha shuh shuh ïa la ka kam.
Na ka liang u MLA ka Mawhati, u Bah Charles Marngar ha ka jingkren ka jong u, u la ai burom sha u Dr Sarvepalli Radhakrishnan, u President ba ar jong ka ri bad uba dei ruh u Vice President ba nyngkong, ha kaba ïa ka sngikha ka jong u, la rakhe kum ka sngi kyrpang jong ki nonghikai. U la ong ruh ba ki nonghikai ki long kum ki ‘riewshlur hakhmat ki khynnah pule ki jongki, halor ka jinglenlade bad ka jingaiti met bad mynsiem ka jong ki ban bet ïa u symbai jong ka jingnang jingstad khlem da tyngkai.
Shuh shuh, u Bah Charles Marngar ula ai khublei kyrpang ruh sha ki lai ngut ki nonghikai kiba la ioh ïa ka khusnam District Awards ha kane ka sngi da kaba shim ïa ka jingkren jong kawei ka samla ba pawnam na ka ri Pakistan kaba la ïoh ïa ka khusnam Nobel Prize halor ka jingïakhun ban pynïoh ïa ka hok pule puthi bad jingshah ban beiñ jong ki khynnah ha ka ri Pakistan, ka Malala Yousufzai kaba ong ‘kawei ka kot, uwei u khulom, iwei i khynnah bad iwei i nonghikai’ kan wanrah ïa ka jingkylla kaba khraw ha ka imlang ka sahlang.
