Shillong Nailur 05
U Bah Shembor Kharsyntiew, Vice President ka Sanshnong Youth Welfare Organisations ba pynïaid ïa ka jaka jngohkai ‘Elephant Falls’ ula pynpaw ba lada ym shah ïa ki kali Tourist ba wan nabar, ki trai jaka ba pynïaid ïa ki jaka jngohkai kin shah ktah bha namar ba kin sa duna ki nongwan jngohkai ha ka Jylla.
ïa kane u Bah Shembor Kharsyntiew u la pynpaw haba ïakren bad U Nongsaiñ Hima ha ka 5 tarik Nailur 2025, hadien ba ka seng ki nongñiah kali kamai ka All Khasi Meghalaya Tourist Taxi Association ka la pynbna ba naduh ka 16 tarik u Nailur kin sa pynlong ïa ka jingïakhih ba kin nym shah shuh ïa ki kali Tourist ban wan nabar ba kin pynpoi ia ki nongwan jngohkai pyrthei ha ki jaka jngohkai kiba don ha ka Jylla.
U Bah Shembor Kharsyntiew u la ong ba ka jingong ka All Khasi Meghalaya Turist Taxi Association ban nym ailad shuh ïa ki kali Tourist ba kin pynpoi ïa ki nongwan jngohkai sha ki jaka jngohkai ka dei kaba biang palat, hynrei ban lah ban pynbeit ïa kane ka jingeh donkam pat ban pynbit pynbiang da ki kali ba na ka Jylla katkum ka jingdonkam jong ki nongwan shangkai khnang ba kan nym don kano kano ka jingthud ïa ki briew ki ba wankai ha kane ka Jylla.
Shuh shuh u la ong, lada kiba wan jngohkai kin shah pynhiar noh ha Shillong ne ha kano kano ki jaka na ka kali remdor ba ki wan, ym don pat ka kali remdor ha Shillong bad kane kan long ka jingeh ïa ki nongwan bad kan ktah bha lada ka Association kam lah ban pynbiang kali ïa ki kumba ki donkam, kane kan ktah bha ïa ki bad ha ka jaka ba kin wan sha ka jylla Meghalaya ki leit noh sha kiwei ki jaka bad ïa ki trai ba pynïaid ïa ki jaka jngohkai.
“Lada kim wan shuh ki briew ba nabar ngi kiba trei ha ki jaka jngohkai ngin nym ïoh ja, kan ktah shibun bad ka jingwan ki nongjngohkai ka long ka jingmyntoi shibun ïa ngi” pynpaw ka nongtrei ha katei ka jaka jngohkai.
Haba ïoh ban ïakren shuh shuh ïa ki longkmie kiba shong die jingdie harud surok ha jingkieng Mawkdok ki pynpaw lada ki nongñiah kali kamai ba napoh ka jylla kim shah wan tang ïa ki kali, ka biang palat, hynrei kam dei pat ban pynthud ïa ka jingleit jingwan ki nongjngohkai namar lada ki nongwan ki duna bad kim wan sha ka jylla kan long ka jingduhnong shibun ia ki namar ki im ja kpoh da kaba shong die jingdie harud surok.
Kumta ki kyntu ïa ka Association bad ruh ïa ki bor sorkar ban pynbiang kali katkum ka jingdonkam ki nongwan khnang ba kan nym long ka jingthud ha ka jingpawnam bad ka jingwan tuid ki briew ba nabar bad na ka pyrthei haba ïadei ba ki wan ban jngohkai ïa ka Ri Khasi.
