Nongstoiñ, Nailur 05
Ha ka sngi thohdieng jong ka taiew ka Nongstoiñ College Nongstoiñ ka la ïoh ban pynlong ïa ka graduation day na ka bynta ki khynnah pule da kaba la pynkup burom ia ki 293 ngut kiba la pyndep ia ka jingpule na katei ka college kiba dei ki soh lyngba u snem 2022-2025 kiba kynthup ïa kiba la pass ïa ka B.Com (Hons), B.A.(Hons) bad Bsc (Hons).
Ha katei ka sngi u Vijay Kumar Mantri IAS Commissioner and Secretary Incharge, Education etc u la long kum u kongsan ryngkat ka jingïadonlang u Bah H.K.Thabah Additional Deputy Commissioner ka West Khasi Hills District, ka Dr. Ïaisan Mawthoh Principal ka Nongstoiñ College bad kiwei kiwei.
Shuh shuh kum ka dak jong ka jingpynkup burom la ïoh ruh ban ai ïa ki syrnod sha kitei kiba la pyndep ïa ki jingpule bad la pyniphuh iphieng shuh shuh ïa katei ka jingïalang da ki sur jingrwai ki jingshad bad kiwei kiwei ki jingpynbyrñia bad la wan ban sakhilang ruh da ki kmie ki kpa jong ki samla pule.
U Vijay Kumar Mantri IAS Commissioner and Secretary Incharge, Education etc haba kren kum u kongsan ha kane ka sngi u la ong ba kane ka sngi ka la dei ka sngi jinglaitluid ïa ki samla pule namar naduh kapor ba phi dang don ha skul haduh ha college ki la don ki kmie ki kpa, ki nonghikai ban ialam bad btin lynti hynrei mynta ka kynti phi la laitluid bad phi la lah ban leh ïa kiei kiei kiba phi mon hynrei ha ryngkat ka jingkit khlieh namar ha kane ka lynti ba thymmai ym nym don shuh ki nongbtin lynti hynrei kin bun sa ki ba pyrshang ban tan ia phi shapoh.
U Kongsan u la kyntu ruh ïa ki samla pule ba kin pyrshang ban trei da kiwei kiwei ki kam namar ban ap tang ïa ka kam sorkar ka la long kaba eh haduh katta katta namar ki post ki don ba lait tang khyndiat bad ki nong aplai kiba bun bah.
U la ong ruh ba kane ka por ka la dei ka por jong ka jingïakhun kaba eh bha nalor ka jingbun ki jingshah pynwit khamtam lyngba ka jingdon ka technology kaba lah ban pynwit bad pynbakla lynti ia ki samla pule bad kane ka technology kaba mynta ka la lam khmat ha kiba bun ki liang bad ym lah ban len, kan sa nanglah ban leh shibun kiei-kiei ruh hynrei lada phi long kiba don ka sap (creative) pat phi shemphang phi lah ban leh ia kiei kiei kaba ka technology ne ka ‘AI’ kam lah ban leh.
