Agartala, Nailur:
Ki pulit ka tnat Railway jong ka Agartala bad ki shipai ïada khappud na Lankamura BOP, bad ki ophisar na ka Ramnagar Outpost ki la kem ïa ki nongkhaïi briew na India kiba la suba ba ki donkti ha ka kam khaïi briew sha shiliang pud.
Kitei ki jingkem ki la jia ha ki jaka jong ka Shanmura, Sharma Lunga, bad Lankamura baroh kiba hap hapoh ka jingpeit jong ki pulit jong ka West Agartala Police Station.
Katkum ki tyllong khubor na ki pulit, kine ki nongshah kynnoh ki don jingïadei bad ki kam kiba bun jait jong ka jingpynsuk ïa ka jingleit jingwan beaiñ sha shiliang ka khappud Indo-Bangladesh.
Kane ka jingshahkem jong kine ki briew ka la long hadien ki jingpyntreikam kiba la ïai bteng khamtam haba ïoh jingujor halor ka jingjah bad ka jingshah rahbor jong ki briew.
Kiba kum kine ki kam sniew ki la ïai jia na ka por sha ka por khamtam ha ki bynta khappud. Ki pulit na ka por sha ka por ki ju pyntreikam pyrkhing ha kaba ïadei bad ka leit ka wan ha ki bynta khappud khamtam haba don ki jingujor ba don ka jingjah briew ha kaba ki ju ïatreilang bad ki shipai ïada khappud.
Ka jingshah kem jong kine ki runar, ka ïadei bad ka mukotduma, kaba la mudui ha Agartala Government Railway Police Station, ha ka 23 tarik , Kyllalyngkot, 2025, ha ki kyndon bapher bapher jong ka Bharatiya Nyaya Sanhita, ka Foreigners Act, bad ka Entry into India Amendment Act.
