Shillong, Nailur 05
U Myntri Sorkar Jylla, u Rakkam A. Sangma, u la ther tyngeh ïa ki seng saiñ pyrthei kiba don ha ka liang pyrshah, namar ka jingleh politik jong ki ïa ka jingïakhih kaba dang ïaid jong ki nongtrei ka Garo Hills Autonomous District Council (GHADC) halor ka jingbym siew tulop mynta ha kine ki 44 bnai ba la dep.
U Sangma, uba dei ruh u nongmihkhmat ka NPP na Siju-Rongara, u la kyntu ïa ki nongtrei ba kin pdiang ïa ka jingpynbeit jong ka Sorkar bad ban ym shah pynngop ha kito kiba kwah ïoh jingmyntoi shimet.
Haba kren sha ki lad pathai khubor ha ka Sngi Thohdieng, u Sangma u la pynpaw ïa ka jingsngewthuh jong u halor ka jingeh jong ki nongtrei, da kaba pynpaw ba un jin da la pyrshah lada ka tulop ba 3-4 bnai ka sahteng lada u don ha ka jaka jong ki.
“Kumno ki im ha kine ki 43 bnai (khlem tulop), tang U Blei hi uba tip”, u la ong.
“Ka dei ka mat kaba shisha bad ka Sorkar ka la sngewthuh bad kumta, u Myntri Rangbah ka Jylla u la dep ban pynbna lypa ïa ka lad haba ïadei bad ka mat jong ka tulop, kaba kynthup ïa ka jingsiew tulop naduh ka 1 tarik u Naiwieng bad ban pynkhuid ïa ki jingsiew kiba sahkut. Na ka bynta kaba sahkut, ka GHADC ka la dep pynbna ban siew ïa ka tulop 5 bnai bad ïa kaba sah yn siew kum ki ‘Arrear’ na ka pla tyngka ka Sorkar Jylla bad na ka pisa jong ki hi,” ong u Sangma haba kyrpad ïa ki nongtrei ba kin pdiang ïa ka jingtyrwa namar “ym don da kawei pat ka lad kaba kham bha ban ïa kane.”
“Ngan kyrpad ïa ki nongtrei (ban pdiang ïa kane).U hynmen rangbah jong nga ruh u dei u nongtrei jong ka GHADC, ngi tip ïa ka jingjynjar jong ka ïing ka sem”, la ong u Myntri.
Shuh shuh, u Sangma u la kynnoh ba ki seng ka liang pyrshah, kynthup ïa ka BJP bad TMC, ki pyndonkam ïa katei ka jingïakhih na ka bynta ka jingmyntoi jong ki, khamtam haba la jan ka ilekshon.
“Nga sngew ba ka long kaba sngewsih ba ïa kane ka shlem treikam la shu kheiñ sting na ka bynta ka kam saiñ pyrthei jong ki katto-katne kiba kwah jingmyntoi. Ki don katto-katne ki ‘riewsaiñ pyrthei kiba kwah jingmyntoi kiba la saiñdur bad ki kwah ba kane ka jingïakhih kan bteng ha jaka ban pynbeit ïa kane ka jingeh,” u la ong.
“Kumta ki (nongtrei) ki dei ban sngewthuh bad kim dei ban shah ïalam bakla ha kiba kwah jingmyntoi. Ki ‘riewsaiñ pyrthei, ka BJP, ka TMC kin pyrshang ban pyndonkam ïa ka jinglong-jingman na ka bynta ka jingmyntoi shimet. Don pat kiba leh ïa kata na ka bynta ban im ma ki hi. Don kato-katne ki ‘riewsaiñ pyrthei kiba pyndonkam ïa kane namarba ka ilekshon ka la jan,” u la kynnoh.
