Shillong Nailur 05
U Superitendent of police (SP) ka East Khasi Hills District u Bah Viek Syiem u la ong ba ka jingïoh bat ïa ki kali ba kit tiar siat kadei hadien ba kitei ki kali ki ïeng hajan ka shopper stop mar pyrshah bad ka Secretariat ha ryngkat ki ïit ïong.
U la ïathuh ba ki lai tylli ki kali kiba la ïoh bat da ki pulit, ba kynthup ka Mahindra Scor-pio rong ïong, Toyota Innova rong ïong bad ka Audi A4 rongsaw ki dei kiba la longtrai da u Mebanshem Snaitang, ba 25 snem ka rta.
Haba kren sha ki lad pathai khubor u Bah Vivek Syiem u la ong ba na pdeng kine ki lai tylli, artylli kim don ïa u Registration Nombar hynrei tang ka Mahindra Scorpio kaba don ïa u Registration Nombar ML 05 AF 0309.
U Bah Vivel u la ïathuh ba kitei ki kali ki dang pynïeng ha pyrshah jong ka Secretariat ha ryngkat ki ïit ïong, ha kaba na ka liang ki pulit SOT ki la leit ban tohkit bad katba ki dang pynlong ïa ka jingtohkit, ki la lap haduh 12 ngut ki briew kiba riam ïong kiba don hapoh jong kitei ki kali.
U la ïathuh ruh ba ha ka jingtalasi la lap kumba 5 tylli ki Air Gun bad ar tylli ki Air Pistol bad hadien kata ïa kine ki briew la rah noh sha Thanad Sadar na ka bynta ban pynlong ïa ka jingtohkit kaba bniah. Nalor kitei ki tiar la ïoh ban kurup ruh bad kiwei kiwei de ki tiar.
“Kumba ka long mynta ngi dang pynlong ïa ka jingwad jingtip bad hadien kata ngin sa pynthikna lada don shuh shuh hadien ba la dep ka jingtohkit kaba bniah” la ong u Bah Vivek Syiem.
Na ka liang u Bah Vivek Syiem u la ong ba ka jingkem ïa u Mebanshem Snaitang kadei kaba u la pynbud ban pyni sha ka pyrthei ba kidei ki briew jong ka aiñ, kaba u la buh haduh 12 ngut ki nongbud ha ryngkat ki kali tah ïit ïong bad ki siren ruh kumjuh. La pynhap hapoh ka Arms Act namar ïa ki Air Pistol hi ym lah ban rah sha ki jaka paidbah la bynrap u Bah Vivek.
U la ong ruh ba ka jing pyndonkam jong u ne u samla Mebanshem Snaitang ïa ki 12 ngut ki ba trei kum ki nong bud jong u, ka pyni ba ka don kaei kaei ha lyndet.
“Ym pat ju Shem ba u nongtrei na ka bynta ka imlang sahlang ban ïaid bad ki 12 ngut ki nongbud kiba phong ïong kum ki security guard, lem bad ki tiar” la bynrap shuh shuh u Bah Vivek.
Haba ïa dei pat bad ka jingrah ïa ki tiar siat kylleng kylleng, na ka liang u SP u la ong ba wat la ki dei ki Air Gun, kum kine ruh dei ban buh ha ïing bad pyndonkam tang ha ki jaka khlaw ym ban pynpaw pyrthei.
Nalorkata, u la ong ba ka jingthmu kaba don ha lyndet jong u Mebanshem snaitang yn sa nang lah shuh shuh ban batai bniah hadien ba la dep ban tohkit ia u.
