Shillong Nailur 07
Ki nongïalam ka Bharatiya Janata Party Meghalaya ki ai ka jingkhublei ba kyrpang ïa ka sorkar kmie haba ïadei ka jingpynkylla thymmai ïa ka jinglum khajna ka GST khamtam ban pynbha ïa ka jingim ki paitbah ki ba duna ha ka ïoh ka kot.
U General Secretary ka BJP Meghalaya u Bah Wankitbok Pohshna u la pynshai ba ka jingpynkylla ka ïa Good and Service Tax (GST) kan wanrah ka jingiohnong ïa ki paitbah bad ruh naduh ka 22 tarik ka dor jong ki mar bam mardih bad kiwei ki mar kin hiar dor noh bad kin don ruh ki mar ki mata ba ymdonkam siew shuh ka khajna, kane kan kham pynsuk ïa ka jingim ba man ka sngi bad kan ïarap ban ai pisa ha kti ïa ki paitbah ban nang pynkhlaiñ ïa ki nongsengkam lajong bad kan kyntiew ruh ïa ka iohkam iohjam bad ïoh ka kot.
Shuh shuh u la ong ba ha ka ri America ka ïa kynduh jingeh ha ka jingkiew dor, ka ri India ka la lah ban pynhiar ïa kane da ka jingïalam bad ka jingiohi jngai u Myntri Rangbahduh ka Ri bad ka kynhun ka jongu, kine ki jingkylla baroh kin wanrah ïa ka jingim ba bha bad ka lah ruh ban kynshew pisa ha ki snem ban dang wan.
‘Kane ka pynpaw ba u myntri rangbah duh ka ri u don ka jingsngewkhia halor kane, ba ka Ri kan nangroi nangkiew ban dang ïaid shakhmat bad kane ka jingpynkylla thymmai ïa ka GST ka pyni ba ka sorkar ha ka jingïalam u Narendra Modi ka don ka thong ban wanrah shisha ïa ka jingmyntoi ïa baroh lang, ka long ka jingdonbok ïa ngi ha kne ka juk kaba ngi phai sha khmat ba ka ri kan nang ïoh shibun ki jingmyntoi lyngba kine ki jingkylla,” la ong u Bah Wankitbok Pohshna.
U Bah Wankitbok u la ong haba ïadei kane ka jingpynhap dor ïa ki mar ki mata kam dei ka ba jia muk mak hynrei ka jingïakren halor kane ka la iaid la kumba shisnem tam mynta ban wanrah ïa kane, namar ymlah ban shuh leh kyrkieh, kane ka kam hap ban da ngam jylliew bha, hynrei ka jingkynthoh ki katto katne ka long ba ki pyndep ïa ka kamram jongki, namar lada kim kynthoh ka long ka jinglehraiñ ïa ki hi.
