Shillong, Nailur 07
Ka seng ki nongñiah ‘Tourist’ taksi ha Assam ka la rai ban leh da kaba tyngeh bad ban shim ïa kijuh ki sienjam lada ka seng ki nongñiah ‘Tourist’ taksi na Megha-laya ka ïaid shakhmat bad pyntreikam ïa ka rai jong ka ha ka 16 tarik Nailur.
Dang shen ka All Khasi Meghalaya Tourist Taxi Association (AKM-TTA) ka la pynbna ban khang ïa ki ‘Tourist’ taksi na Assam ban kit ïa ki nongjngohkai pyrthei sha ki jaka jngohkai pyrthei kiba don ha Meghalaya.
Kum ka jubab halor kane ka rai, ka Tourist Transporters’ Association of Assam (TTAA), ba la ïalam da u President jong ka, u Kaushik Bhuyan, ka la pynbna ba ki nongpynïaid na Assam ruh kin khanglad ïa ki taksi ba don ïa u nombor Megha-laya ban leit shaw ïa ki nongleit-nongwan na steshon rel ha Guwahati bad Kad Liengsuiñ LGBI, ka ban treikam naduh ka 16 tarik u Nailur lada kane ka jingkhang kan ïaid shakhmat.
U Bhuyan u la ong ba ïa katei ka rai la kyrshan da ka Motor Paribahan Sanmilita Sewakarmi Mancha, Assam. U la maham ruh ba ki jingpyrkhing ki lah ban pur wat sha ki kali kit mar kumjuh, ka ban ktah jur pat ïa ka jingpynbiang mar ba kongsan jong ka Meghalaya.
U nongïalam ka TTAA u la kynthoh ïa katei ka jingleh jong ka AKMTTA kum ka “bym don nongrim bad ka jingbym ïohi jngai,” da kaba kdew ba ki kali Assam ki treikam da ki kot ki sla kiba biang ha kylleng ki Jylla ka Thaiñ Shatei Lam Mihngi, kynthup ïa ka Meghalaya bad Arunachal Pradesh.
U la maham ba kum kine ki sienjam kin ktah ïa ka kam jngohkai pyrthei bad ka khaïi-pateng, ki bynta kiba kongsan na bynta ka ïoh ka kot jong ka Meghalaya.
Na ka liang ka TTAA ka la kyntu ïa ka Sorkar Meghalaya ban tuklar bad khanglad ïa ka AKMTTA ba kan pyntreikam ïa ka rai jong ka, da kaba maham ba lym kumta ka tnad jngohkai pyrthei ha baroh ar tylli ki Jylla kan sa shah ktah shi kat dei.
