Jowai, Nailur 07
Kum shibynta ban pynshlur ïa ki briew ha ka ban sumar bad adkar ha ka liang ka koit ka khiah khamtam kiba na ki thaiñ nongkyndong, ka Jaiñtia Hills Development Society ryngkat ka jingïatreilang bad ka Jowai Community Health Association (JOCHA) bad ka KHUBLEI Germany, ki la pynlong ïa ka prokram jingai jingsumar (General Health Camp) ha ka shnong Kyndongtuber ha ka 4 tarik Nailur.
Ha kane ka Health Camp la wan ïashim bynta da ki spah ngut ki nongshong shnong, naduh ki longkmie, ki longkpa, ki tymmen bad ki khynnah rit ha kaba haduh 6 ngut ki Doctor ki la wan ai ka jingshakri mon sngewbha ha kane ka sngi.
Hashwa ban pynlong ïa ka jingeksamin bad ai dawai ei la don ka jingïalang ba lyngkot ba la pynïaid da ka Kong Juliana Pakma kaba ka la ai ka jingïaroh ïa ki nongpynïaid jong kitei ki ophis kiba la shim ïa katei ka sienjam ban ïarap ïa ki nongkyndong.
Ha kajuh ka por, ki nongtrei na ki ophis Sorkar kiba kynthup ïa ka Meghalaya Aids Control Society (MACs) bad ka District Tuberculosis Office (DTO cum DACO) kila ai ka jingpynshai bad jinghikai halor ki lad jingïarap kiba ka ophis ka don khnang ban pynduna ïa ka jingsaphriang jong ka jingpang HIV bad TB.
Ha kane ka jingïalang la ïadonlang ruh u Director ka JHDS u Fr. Manbha Pakem, ka Sr. Beatric Maring President JOCHA, ka Dr. P. Lamare, District Tuberculosis Officer Jaiñtia Hills, u Dr. M.H Borbhuya, Medical Officer Sahsniang PHC, ka Dr. P. Dkhar, Dr. Mini Shadap, Dr. Santona Synnah bad ka Dr. Wandaplin Suchiang.
