Shillong, Nailur 07
Ha ka sien jam kaba nyngkong eh, ka Meghalaya Football Association (MFA) ha ka jingïalang kaba la long ha ka sngi Saitjaiñ, ka la rai ban ai jingiarap pisa ïa ki nongïalehkai phutbol ka Jylla kiba la mihkhmat ïa ka ri India ha ki lympung ïalehkai shabar ri.
Ïa kane ka sien jam yn pdiang sngewbha da baroh ki nongïalehkai phutbol ka Jylla kibala ïoh ban mihkhmat bad phong ïa ka jersey jong ka ri India.
Ki nongïalehkai senior (shynrang bad kynthei) kin ïohpdiang T. 50,000, katba ki nongïalehkai kiba la mihkhmat ha ka U-23 jong ka ri, kin ïoh T. 40,000. Ki nongïalehkai kiba la ïoh ban mihkhmat ïa ka ri ha ka junior lane sub-junior kin ïohdiang T. 25,000.
Kumba ka paw ki la don katto katne ngut ki ‘thei ïalehkai ka Jylla kiba la mihkhmat ïa ka ri India ha ka U-17 bad U-20. Kine ki long ka Fragrancy Riwan, Ribansi Jamu, Alisha Lyngdoh bad ka Bonifilia Shullai. Ha ka liang ki shynrang ki long u Manbhakupar Malngiang bad u Banlamkupar Rynjah kiba la mihkhmat ïa ka ri India ha ka U-17 ha u snem ba la lah bad u Lionel Daryl Rymmei ha ka kynhun ïalehkai U-20.
Kiwei pat ki rangïalehkai kiba la mihkhmat ha ki snem kiba la leit ki long u Ricky Shabong bad u Halen Nongtdu ha ka ‘junior’, kumjuh ki khlur ïalehkai kum u Eugeneson Lyngdoh, Aiborlang Khongjee bad u Rocus Lamare ha ka ‘senior’.
