Nongstoiñ, Nailur 07
Ki nongïalam ka Khasi Student Union (KSU) Mawshynrut Circle ha ka sngi Palei kila leit ban ïakynduh ïa ka DMHO ka West Khasi Hills District ban dawa ban pynbit pynbiang ïa kiba bun ki jingduna hapoh ka Riangdo CHC bad kumjuh ha ki Sub Centre ka thaiñ Mawshynrut baroh kawei.
Hadien ka jingïakynduh ïa ka DMHO, u samla Armstrong Sohshang, President ka seng haba kren bad ki lad pathai khubor u la ong ba na ka liang jong ka seng kala ïoh ruh ban pynsngew ïa shibun ki mat jingdawa kiba donkam hapoh ka CHC ha Riangdo bad kiba kham kongsan ki long ban thung noh ïa u Block Medical Officer, u Doctor in-charge ka CHC bad kumjuh u Doctor bniat nalor ban pynbiang dawai bad nongtrei ha ki Sub Centre.
Na ka liang jong u samla Ulysis Ryntong, General Secretary ka seng u la ong ba dang ha kine ki khyndiat sngi ka seng kala ïoh ban leit jurip ïa ka CHC ha Riangdo ha kaba kala lap ba katei ka CHC kala khapngiah shaba palat ha kaba ka kamra thiah pang, la ïathiah lang bad longkmie bad rangbah bad khynnah.
Kumta na ka liang jong ka KSU kala dawa jur ïa ka Sorkar lyngba ka ophis jong ka DMHO ba kan pynbit pynbiang ïa kiba bun ki jingduna hapoh ka Riangdo CHC bad kumjuh ha ki Sub Centre bad ka seng kala kyntu jur ïa u MLA bad u MDC jong ka Mawshynrut Konstitwensi ba kin peit bad shimkhia lem halor kane ka bynta.
