Shillong Nailur 07
Ka Mawlai Town Dorbar ka khot ka wer ïa ki nongshongshong jong ka shnong Mawlai, ïa ki seng kynthei, ki seng samla ban ïatreilang na ka bynta ban ïakhun thma pyrshah ïa ka jingjyllei u drok, ki kam tuh, kam thiem bad ki kam sniew, kiba la jia ha kylleng ki bynta jong ka shnong Mawlai.
Ka Mawlai Town Dorbar ka la pynpaw ïa kane, ha ka jingialang paidbah, ba la khot pynlong da ka Seng Samla Mawlai Pyllun, ba la pynlong ha madanheh mini stadium, namar ka jingsngewkhia ïa ka jingjyllei ki nongdih drok hapoh ka shnong Mawlai, kaba la pynshongsyier ïa ka shnong ka thaw bad kiba bun ki longïing longsem.
U President ka Seng Samla Mawlai Pyllun u Bah Samuel Biam u la ong bun ki khynnah samla jong ka shnong Mawlai kiba dei na ka longïing longsem ba duk ba jynjar, ki la ngat ha u drok bad kane ka la ktah jur ïa ki kmie ki kpa.
U la ong ruh, “Ba jyllei ki kam sniew, ki kam tuh, kam thiem hapoh ka shnong ka thaw, ka dawbah ka dei namar ba ka jur palat ka jingjyllei jong u drok bad ngim kwah ba ki nongshong shnong ka shnong Mawlai kin don hapdeng ka jingshongsyier mynsiem.”
U Bah Samuel Biam u la ïathuh ba ka seng ka la aiti ruh ïa ka dorkhas sha ka sorkar da kaba ai jingmut ba dei ban buh noh da ka Narcotic Control Board, ba kan peitngor ïa ka jingwan jong u drok sha ka Jylla, ban buh ruh ïa ka Rehabilitation Centre ha Mawlai bad kiwei kiwei de ki mat jingdawa.
Shuh shuh kiwei pat ki nongkren ha kane ka sngi ki la ong, ban ïakhun bad ïaleh pyrshah ïa u drok, ka shnong Mawlai ka donkam ïa ka jingïatreilang, ka jingïatylli ba kan long ka bor bad kane ka jingïalang ka long ka jingkhot ïa baroh ki nongshong ka shnong Mawlai ban ai ka jingïatreilang, khnang ba kan long ka jingshngaiñ ïa ka lawei jong ki khun ki kti.
Ki nongkren ha kane ka sngi ki ong ba, ban lah ban pynduhjait ïa u drok ha ka jylla, ngi donkam ïa ka sorkar ba kan shimkhia bha, hynrei kumba ka long mynta kam shngaiñ shuh ban phah skul ïa ki khun, namar ymdon shuh ka jingshngaiñ ha ka iaid ka ïeng, lada ka sorkar kam shimkhia bad kam lah ban leh eiei ha kum kane ka por ka jaitbyndriew ka sa ngam noh.
