Jowai, Nailur 07
Ka Socio Literary & Sports Association Committee jong ka Jing-ïaseng Samla Balang Presbyterian Mihmyntdu ha ka sngi Saitjaiñ ka la pynlong ïa ka 16 Marathon, kum shi bynta ka jinglehkmen Youth Week & Youth Sunday halor ka phang “U Jisu ka nongrim jong ka jingim” – 1 Korinth 3:11.
Ha kane ka sngi u District Sports Officer (DSO) ka West Jaiñtia Hills Bah Khroobok Passah ula long kum u kongsan haka jingdonlang u Waheh shnong ka Mihmyntdu u Bah Abul Phawa, Bah Eki Chyrmang ryngkat ki Tymmenbasan bad Rangbah Balang.
U Bah Khroobok kum u kongsan ha ka jingkren u la pynpaw ka jingsngewnguh ïa ka Jingïaseng Samla Balang Presbyterian Mihmyntdu kaba la shim ïa ka sienjam kum shi bynta ban ailad ïa ki nongshong shnong bad ai mynsiem ïa kiba don sap ha ka jingïalehkai.
U la ai mynsiem ruh ïa ka Jingïaseng Samla Balang Pres-byterian Mihmyntdu ban ïai bteng ïa ka kum kan ka prokram khnang ba ki khun ka shnong kin shkur ban mih shakhmat ban ïashim bynta ha kino kino ki jait jingïalehkai.
Hadien ka jingïalang la sam trophy ryngkat ki syrnod lem bad ki pisa sha ki nongjop ha ki artylli ki kyrdan ïalehkai kynthup ka kyrdan Senior Boys/Girls bad Junior Boys/Girls.
Ha ka kyrdan Senior Boys la wan nyngkong da u Wandame Kyndait, ba-ar u Chantremi Shylla bad balai u Bormi Kyndait. Katba ha ka Senior Girls ba nyngkong ka Monlangki Kyndait, ba-ar ka Mini Kyndait bad balai ka Beauty Shylla.
Ha ka Junior Boys, u Lurshai Phawa ula wan nyngkong, ba-ar u Honesty Phawa bad balai u Bih Chyrmang. Ha ka Junior Girls la wan nyngkong ka Ishka Kyndait, ba-ar ka Haphi Siangshai bad balai ka Sambun Kyndait.
