Shillong, Nailur 07
Ka Mylliem Lum bad ka Tynring ki la khur jingjop ha ka lympung ïalehkai Second Division Football League 2025 ba la pynïaid da ka Shillong Sports Association ha ka sngi Saitjaiñ ha SSA Stadium kaba ha First Ground, Polo.
Ha ka jingïalehkai jong ka Group-A, ka Mylliem Lum ka la pynliem noh ïa ka Umpling da 4-0 kol, katba ka Tynring ka la khur ïa ka jingjop kaba nyngkong ha ka Group-C hadien ba ka la jop da 3-2 kol ïa ka Umphrup.
Ïa kitei ki kol na ka Mylliem Lum la thep hapoh 20 minit ha ka kylla miet lyngba u Sbinstar Jana (64) hashwa ba u Warjri un thep ïa ki ar kol ha ka minit kaba 70 & 80 bad kawei pat da u Lestarwell Khyriem (83).
Te kumta ka Mylliem Lum ka la bat ï aka kyrdan ba hakhlieh ha katei ka group hadien ba ka la tam ïa ka Mawpat lyngba ka jingïapher ha ka jingthep kol. Kine ki kynhun kin ïakynduh ha ka sngi Balang. Katba ka Umpling ka dei ka jingïakhun kaba khatduh ha kaba ka la wan ha ka kyrdan basaw, hynrei ka lah ban shah pynhiar kyrdan hadien ka jingïakhun hapdeng ka Jongksha bad ka Lumshyiap ka ban long ha ka sngi Thohdieng.
Ha ka jingïalehkai jong ka Group-C, u Jovinal Mylliempdah (30) bad u Bakmenkordor Mylliem (35) ki la lah ban thep kol na ka bynta ka Tynring ha ka kylla step, hynrei ka Umphrup ka la lah ban pynphai kylla ar kol ha ka kylla miet lyngba u Shariwell Lyngdoh (66 & 75). Ka Tynring ka la thep biang sa shi kol lyngba u Hasken Roy Kharsati na ka bynta ban khur syndon ïa ka jingjop na ka bynta ban wan ha ka kyrdan ba san. Katba ka Umphrup ka la hiar sha ka kyrdan shatrai ha kane ka lympung.
