Tura, Nailur 07
Ka Association of Meghalaya Medical Students, RIMS, Imphal ka la kyntait jur ïa ka jingdawa panmap jong ka National Peoples Youth Front (NPYF) na uwei u paralok jong ki uba la pynpaw ïa ka jingsngewkhia jong u, hapoh ka jingïalang halor ka jingthmu ban tei ïa ka Tura Medical College.
Ka seng ki samla pule ka la ong, ka Riti Synshar ka ri, hapoh ka Article 19(1)(a) ka kdew ba uwei pa uwei u nongshong shnong, u don ïa ka hok ban kren bad ban pynpaw. Kumta kum ki samla pule, la pyndonkam ïa kane ka hok ha kaba pynpaw ïa ki jingsngewkhia, halor ka jingtyrwa ïa ka rukom pynïaid ïa ka PPP na ka bynta ka Tura Medical College,.
“Ban khot ïa kum kane ka jingïashim bynta, kum ka jingpynthut ka dei ka jingpyrshang bym hok bad kaba pyrshang ban pynsngap jar ïa ki sur paidbah ha ka ri synshar paidbah,” la ong ka association.
Shuh shuh ka seng ki samla pule ka ong, “Ka Article 21 ka ai ïa ka hok jong ngi, ban im bad ba laitluid, kaba kynthup ban ïoh laitluid ban shimbynta ha ki jingïakren kiba ktah beit ïa ka lawei jong ngi bad ha ka jingai jingshakri ïa ka jylla jong ngi, namarkata, ngi kyntait ïa kano kano ka jingdawa na ka bynta ka jingpanmap khlem jingpynbeit.”
