Tura, Nailur 07
Katto-katne ngut ki briew kiba donkti ha ki kam pyrshah ïa ka imlang-sahlang bad kiwei-kiwei ki kam runar, dang shen ki la shah rai pynrem ha ki ïingbishar ha Baghmara, South Garo Hills, hadien ba la lap ïa ka jingdonkti jong ki ha la ki jong ki kam runar.
Napdeng kito kiba shah rai pynrem, ki kynthup ïa u Daljitsing A. Sangma, uba la lap ba u donkti ha ki kam runar ban thombor bad leh be-i-jot kumba la batai bad ba lah ban shah pynshitom katkum ka U/S 375(a) ba hap hapoh 375 (sixthly)/376(2)(f)(n)/376(3) IPC R/W Sec 3(a)/5(1)(n) 6 POCSO Act, 2012.
La rai pynrem ïa u da ka jingset patok kaba tyngeh na bynta 20 snem bad ka kuna kaba T.50,000/-.
Uwei pat uba la shah kynnoh, u Kensibirth G. Marak la lap ba u donkti ha ki kam runar kiba la batai bad ba lah ban shah pynshitom katkum ka U/S 305 (a) BNS bad katkum kane, ka Ïingshari ka la rai pynrem ïa u da ka jingset patok kaba 1 snem nalor ka kuna kaba T. 10,000/-.
Ha kawei ka liang, ka Ïingshari ka la lap ruh ïa 3 ngut ki briew – Nazir Miah, Shuyal Miah bad Faysal Miah kiba donkti ha ka kam runar kaba lah ban shah pynshitom katkum ka U/S 14 A(b) Foreigners Act, 1946, namar ba ki la rung sha ki jaka jong ka India khlem ki kot ki sla kiba biang.
Katkum kane, la rai pynrem ïa kine ki 3 ngut da kaba set patok 2 snem bad ka kuna kaba T. 20,000/-.
Sa uwei pat u briew – Hafikul Islam, la lap ba u la rung shapoh ki jaka jong ka India khlem ki kot ki sla kiba biang bad la rai pynrem ïa u ban set patok 2 snem bad ka kuna kaba T. 10,000/-.
