Khliehriat, Nailur 07
Ka National People’s Party (NPP), East Jaiñtia Hills District Unit, ka la pdiang sngewbha ïa ka jingwan pynïasoh jong u Lalwilliama Thaite, MDC ka Congress na Saipung-Nongkhlieh Konstitwensi bad u Philip Tangliang MDC barim ka Sumer na ka Congress sha ka seng ha ka jingïalang kaba la long hapoh Khliehriat West Community Hall.
Hadien ka jingleit pynïasoh noh jong u Lalwilliama sha ka NPP, mynta ha JHADC sah sa arngut ki MDC Congress kata u Rikut N Parien, MDC Saphai bad Madonbai Rymbai, MDC ka Khliehtyrshi.
Ha kane ka prokram la ïadon lang u Bah Wailadmiki Shylla, MLA ka Jowai bad ka Kong Santa Mary Shylla, MLA ka Sutnga Saipung Konstitwensi nalor ki katto katne ki MDC bad ki nongïalam kiba kynthup ïa u Bah Seiborlang Shadap, MDC ka Sutnga Narwan, u Hambertus Nongtdu, MDC Sutnga Nongkhlieh, Dr. Sankey Shangpung, MDC ka Bataw Lakadong, Kong Violet Lyngdoh, MDC Khliehriat Rymbai, Bah Krison Langstang, MDC Sumer, Thomas Nongtdu MDC barim ka JHADC, Octomewot Lamin MDC JHADC bad u Emlangky Lamare MDC barim ka Narpuh.
Ha kane ka jingïalang la sakhi ïa ka jingwan ïashim bynta shitrhem jong ki nongtrei ka NPP, ki rangbah shnong bad ki paidbah nongkyrshan ka NPP kaba pynpaw ïa ka jingkhlaiñ bad ka jingïatylli jong ka seng hapoh ka thaiñ.
Haba kren ha ka jingïalang, u Bah Wailadmiki Shylla u la ong ba ka jingwan pynïasoh jong u Lalwilliama Thaite bad u Bah Philip Tangliang sha ka NPP ka pynpaw ïa ka jingshaniah bad ka jingsngew skhem ha ka jingiohi jngai jong ka seng bad ki nongïalam jong ka. “Ka jingtbit bad ka jingshemphang bad ka jingkut jingmut ka jong ki kan nangpynkhlain ïa ka jingïatreilang ka jong ngi ha ka jingpyrshang ban ai ka jingshakri ïa u paidbah bad ban wanrah ïa ka roi ka par kaba don jingmut hapoh ka thaiñ,” ong u Ma Wailad.
Katba ka Kong Santa Mary Shylla ka la ong, “Kane ka dei ka khyllipmat jong ka jingïatylli bad ka jingïaid shaphrang na ka bynta ki konstitwensi jong ngi. Ka jingkyrshan jong ki nongïalam kum u Lalwilliama Thaite bad u Bah Philip Tangliang kan nangpynkup bor shuh shuh ïa ka NPP ba kan ïatreilang bad ki paidbah bad ban pynthikna ba ka roi ka par kan poi sha man la ki shnong bad ki thaiñ. Ryngkat lang ngin ïai bteng ban pynneh ïa ka jinglong jong ka jingshakri, ka jingkynthup lang bad ka saiñ hima kaba buh nyngkong ïa ki paidbah.”
