Mawkyrwat, Nailur 06
Ki pulit ka thanad Mawkyrwat ha ka 6 tarik u Nailur, 2025 ki la khot hajir ïa u samla Forward-man Nongrem, President KSU South West Khasi Hills District bad kiwei kiwei ki nongïalam jong ka seng hadien ba ka la don ka jingujor na u Syiem ka Hima Maha-ram pyrshah ïa une u nongïalam lem bad kiwei na ka daw ka jingïakhih jong ka KSU bad kiwei ki snegbhalang ban pyrshah halor ka jingthmu ai jaka ïa ki shipai ha Photmula kaba hap hapoh ka Ranikor Civil Sub Division, South West Khasi Hills District.
Ha katei kajuh ka sngi, na ka liang u samla Forwardman Nongrem u la ai ruh ka jingujor kylla pyrshah ïa u Syiem Niandro Syiemiong da kaba kyntait ba ka KSU bad kiwei ki sengbhalang kim shym la leh beaiñ hynrei ki la pyrshah ïa ka jingthmu ban ai ktem shipai da u Syiem ha ka lynti kaba jai-jai bad ha ka nongrim jong u paidbah.
Ha ka jingujor pyrshah ïa u Syiem Maha-ram, la kdew ba kane kam dei kaei kaei hynrei ka jingkynnoh khlem nongrim bad khlem kino kino ki jingpynshisha.
Katkum ka jingujor jong u samla Forwardman Nongrem la ong ba u Syiem u la pyndonkam bakla ïa ka aiñ da kaba ujor khlem nongrim ïa ki nongïalam KSU bad kiwei ki sengbhalang tang na ka bynta ban pynsngap jar ïa ki sengbhalang bad ki paidbah haba ki kren pyrshah ïa ka jingleh jong u kum u Syiem da kaba kdew ruh ba kane ka long kaba beaiñ ha kaba ki pulit ki dei ban shimkhia ban tohkit halor kane.
La ujor ruh pyrshah ruh ïa u Syiem kum uta u nongkhanglad ïa ka hok ki paidbah da kaba pyrshang pynsngap jar jubor ïa kat kiba ïa pyrshah ïa u.
Ha kane ka jingujor la ban jur ba dei ban pynngat kyndon aiñ pyrshah ïa u Syiem namar ka jingpyndonkam bakla ïa ki kyndon aiñ ka dei ka kam beaiñ bad kaba lah ruh ban pynshitom ïa kita ki briew da ka aiñ hi.
U samla Forwardman u la ong ruh ba watla hapdeng kiba kum kine ki jingpyrshang ban kynnoh nongleh kam sniew ïa ki nongïalam bad ki jingpyrshang ban pynngat kyndon aiñ hynrei ka seng ka la shim ïa ka rai ba kan nang bteng ban ïakhih halor kane ka jingthmu ai ktem shipai kat haduh ba u Syiem un lum ïa ka Durbar Hima bad pynbna paidbah ba la weng ïa ka jingthmu ai jaka sha ki shipai ha Photmula.
