Jowai, Nailur 07
Ka Lumphyrnai Sohphoh ka la lah ban pynjem khnap ïa ka Heiboriong-I FC haduh 13-1 kol ha ka Super Division na ka bynta ka Kelsiroy Pala Memorial ba la pynïaid da ka Thadlaskeiñ Sports Association (TSA) ha ka sngi Saitjaiñ ha Wahïajer Multi Sports Complex.
U Sumar Suting u la khur ar tylli ki hat-trick da kaba thep marwei haduh hynriew kol (9,16,32,51,84 & 90+2). Ïa kawei pat ka hat-trick la ïoh da u Wellson Suting (55,64 & 74), katba ïa kiwei pat ki kol la thep da u Pynbiang Mynsong (45+2), Dapyntgen Suting (57), Hamebanjop Khynriam (62), bad u Arniki Suting (81). Katba ka Heiboriong-I FC ka la pynphai kylla shi kol lyngba u Riwan Rymbai (56) hashwa ba kan mad ïa ka jingshah rem.
Ha kawei pat ka jingïakhun jong kane ka lympung, ka Pohskur Phlong Ïingkhaw ka la jop da 2-1 kol ïa ka Niriang. Ïa kine la thep da u Maidong Mukhim (60), Kamwathrang Mukhim (84), katba na ka Niriang la thep da u Livingstar Myrboh (44).
Haba phai sha ka 2nd Division (Joybell Suiam Memorial Football Tournament) hapdeng ka United Phlong Ïingkhaw bad Mukhla Sohshrieh ka la kut da ka jingïakhaid kaba mar 2-2 kol. U Juhiki Suting (3 & 5) u la thep ar kol n aka bynta ka United Phlong, katba ïa ka Mukhla Sohshrieh la thep da u Treki Sari (12) bad u Ebious Sari (47).
Ha ka jingïalehkai kaba bud, ka Mukhla Mission ka la pynliem noh da 7-1 kol ïa ka Mukhla Veteran. U Jofferson Bang u la khur ïa ka hat-trick da kaba thep ha ka minit kaba 36,40 & 47), kumjuh u Bishar Dkhar (12 & 37), Oliver Rymbai (42) bad u Arny Dkhar (50), katba na ka Mukhla Veteran la thep da u Constant Syngkon (2).
