Nongstoiñ, Nailur 07
Watla mynta kiba bun ki surok ha ki bynta jong ka West Khasi Hills District ki dang don hapdeng ka jingpyntrei, hynrei haba phai pat sha ki bynta jong ki thaiñ nongkyndong, ki paidbah nongshong shnong haduh mynta mynne hi ki dang ïai mad ïa ki jingeh.
Ka surok na Mawdet sha Mainop ka dei kawei na ki surok kaba ki paidbah mynta ki mad ka jingeh namar ka jing-sniew shaba palat pud jong kane ka surok, bad kane kala ktah haduh katta katta ïa ka ïaid ka ïeng, ka kit ka bah khamtam ba kane ka thaiñ ka dei kawei na ki thaiñ ïa kaba ki nongshong shnong ki pynmih ïa u synsar.
Ïa kane la pyntikna bad lap ruh da ka Ri Khasi Sepngi Federation (RKSF) hadien ka jingpynlong ïa ka jingjurip ha kine ki kyndiat sngi ba la lah.
U Bah Mawkordor Kharsyiemlieh, President ka RKSF u la ong ba ha ka jingjurip bad ka jingpeit jong ka seng ïa kane ka surok na Mawdet haduh Mainop kaba hap hapoh Rambrai Konstitwensi, ka la long kaei kaei kaba i sangsot shisha.
Shuh shuh u la ïathuh ruh ba katei ka surok ka dei kawei na ki surok kaba pynïasnoh ïa kumba san tylli ki shnong ha katei ka thaiñ.
U la ong ruh ba ka jingsniew jong katei ka surok, kaba i sangsot ka long ba ki don ruh ki khynnah skul kiba leit skul ha Rambrai bad ki ïaid lyngba kane ka surok bad khamtam lei ha ka pang ka shitom katno ka ktah jur bha.
U Bah Mawkordor u la ong ruh ba kumba long mynta ki kali kiba lah ban ïaid ha kane ka surok kumba long mynta ki dei tang ki jeep bad ki kali kiba don ‘special gear’.
“Ka jingkylli mynta ka long ba hato ki nongmihkhmat kim iohi mo ïa kum kine ki surok ne kaei kaba pynlong ïa kiba kim leh eiei,” ong u Bah Mawkordor.
U la ong ruh ba ka seng ka dawa jur ïa ka tnat PWD ha kajuh ka por ïa u nongmihkhmat ka thaiñ ba u dei ban burom bad peit lem ïa kum kine ki shnong khnang ba ki paidbah kiba ïaid ba ïeng na kane ka surok kin ïoh ban ïaid suk kumba kiwei ki para nongshong shnong ki ïoh lem ïa ka hok.
