Shillong, Nailur 08
U Cristiano Ronaldo u la thep ar kol ha kaba ka Portugal ka la pynliem noh ïa ka Armenia da 5-0 kol bad kane ka pyni ïa ka jingkhlaiñ bor ha ka jingïaid lynti ban ïoh rung sha ka World Cup ha ka sien kaba hynriew.
Kine ki kol ki la kyntiew ïa u Ronaldo ban kynjoh sha ki 140 ha ki lympung ïalehkai bar ri, kaba pyni ïa ka jingbteng ha ka jingkiew ha ka kam ïalehkai hashwa ba un shongthait.
Ha ka rta kaba 40 snem, u Ronaldo dangshen u la soi ïa ka kontrak kaba thymmai bad ka klob jong ka Saudi Arabia ka Al Nassr bad ban ïalam ïa ka Portugal ban khur jingjop ha ka UEFA Nations League ha ka aïom ba la lah. Kumba ka long mynta utei u khlur ïalehkai u dang duna sa tang ka trophy jong ka World Cup, katba u Lionel Messi u la lah ban khur ïa ka khusnam na ka bynta ka Argentina ha u 2022.
Ka World Cup 2026 ha America, Canada bad Mexico ka lah ban dei ka kabu kaba khatduh ïa u Ronaldo ban jop ïa kane ka lympung. Baroh arngut ma u bad u Messi kin sa mih madan ha ka sien kaba hynriew ha ka World Cup, da kaba tam ïa kiwei pat ki nongïalehkai kiba la mih madan ha ki san tylli ki lympung ïalehkai.
U Ronaldo uba la jop san sien ïa ka Champions League bad ïa ka European Championship ryngkat bad ka Portugal, u la thep kol ha baroh ar tylli ki kylla ïakhun ha Vazgen Sargsyan Republican Stadium ha ka por ba ka Portugal ka la ïakhun nyngkong ïa ka Group-F na ka bynta ban khur ïa ki lai poiñ.
Ïa ka kol kaba nyngkong ha katei ka jingïakhun la thep ha ka minit kaba 10 lyngba u Joao Felix, hynrei hadien 11 minit la pynbud da u Ronaldo. Hadien shiteng kynta kane ka kynhun ka la thep da u Joao Cancelo (32).
Ha ka kylla miet u Ronaldo (46) bad u Felix (61) ki la pynbud biang ïa ki kol jong ki hashwa ba ka kynhun kan khur ïa ka jingjop.
Halor kane ka jingjop, na ka liang u rangïalehkai shapdeng u Portugal u Vitinha u la ong, “Ka long ka jingïalehkai kaba sngewtynnad.”
Ha kiwei pat ki jingïakhun, ka Ireland ka la ïakhaid mar 2-2 kol bad ka Hungary. Kane la wan urlong lyngba ka jinglah ban pynphai da u Adam Idah hashwa ban kut ka jingïalehkai hadien ba ka Hungary ka la tam da 2-0 kol lyngba u Barnabas Varga bad u Roland Sallai ha ka kylla step.
U Evan Ferguson u la pynphai ha ka kylla miet bad hadien ka Hungary u la hap ban ïalehkai sa tang shiphew ngut na ka daw ka jingshah sei red card u Sallai na ka daw ba u la pynur ïa u Dara O’Shea.
