Shillong, Nailur 08
U Myntri Rangbahduh ka ri u Narendra Modi u la ai khublei kyrpang ïa ka kynhun ki rangïalehkai hockey ka ri India hadien ba ki la lah ban pynliem noh ïa ka South Korea da 4-1 na ka bynta ban long ka lahduh ha ka Asia Cup 2025.
Ha katei ka jingïakhun final kaba la long ha Rajgir, Bihar, ha ka sngi U Blei, ïa ki kol la thep da u Dilpreet Singh (28′,45′), u Sukhjeet Singh (1′) bad u Amit Rohidas (50′).
Ha ka jingthoh ha ka X, u PM Modi u la ong, “Nga ai khublei ïa ka kynhun ki rangïalehkai jong ngi na ka bynta ka jingjop jong ki ha ka Asia Cup 2025 kaba la long ha Rajgir, Bihar. Kane ka jingjop ka long kaba kham kyrpang shuh shuh namar ba ki la jop ïa ka kynhun ïalehkai kaba la bat teng ïa ka nam lahduh, ka South Korea. Kane ka dei ka por kaba sngew sarong na ka bynta ka Hockey India bad ki jingïalehkai ka India. To ai ba ki nongïalehkai jong ngi kin nangkiew sha ki kyrdan kiba kham shajrong bad ban wanrah ïa ka burom kaba kham heh ïa ka ri hi baroh kawei.”
U coach jong ka kynhun ïalehkai kriket ka India bad uba long ruh u rangïalehkai kriket barim jong ka India, u Gautam Gambhir ruh u la ai jingïaroh ïa ka jingïa-lehkai jong ka kynhun, da kaba thoh ha ka X, “Nga ai khublei halor kane ka jingjop.”
Na ka liang u myntri ka tnat ïalehkai ka Sorkar Pdeng u Mansukh Mandaviya u la ïasnohkti lang ban rakhe ïa kane ka jingjop. Haba ïasam ïa ki jingmut jingpyrkhat jong u ha ka X, u la ong, “Ka jingïalehkai kaba itynnad bha! Ka jingai khublei kaba khraw ïa ka kynhun ïalehkai jong ka India kaba la lah ban pynliem ïa ka Korea da 4-1 kol ha ka phainal jong ka Asia Cup Hockey kaba la long ha Rajgir, Bihar, bad ban rah ïa ka nam lahduh.
Halor kane ka jingjop, na ka liang ka Hockey India ka la pynbna da ka khusnam pisa kaba INR 3 lakh sha baroh ki rangïaleh-kai bad T. 1.5 lak sha ki coach bad baroh ki nong-ïarap. Ka India ka la rah khatduh ïa ka Asia Cup ka dei ha u snem 2017 ha Dhaka.
