Shillong, Nailur 08
Ka India ka la wan ha ka kyrdan balai ha ka CAFA Nations Cup, hadien ba ka la lah ban pynliem ïa ka Oman kaba don ha ka kyrdan ba kham shakhmat, lyngba ka tie-breaker da 3-2 kol ha ka lah sngi U Blei ha Hisor Central Stadium ha Hisor, Tajikistan.
Ha kane ka jingïakhun jong ka ‘playoff’ baroh ar ki kynhun ki la ïakhaid mar 1-1 kol haduh kaba kut ka jingïalehkai. U Udanta Singh Kumam u la lah ban pynphai kylla na ka bynta ka India hadien ba ka Oman ka la thep kol nyngkong ha ka minit kaba 55 lyngba u Jameel Al Yahmadi.
Watla kine ki kynhun ki la ïakhun ïa ka ‘extra time’ hynrei kim shym la lah ban thep kol bad u rangïalehkai ‘dien ka Oman u Ali Al Busaidi u la shah beh na madan hadien ba u la ïohpdiang da ka red card ha ka minit kaba 96.
Na ka bynta ka India ki rangïalehkai kiba la lah ban pynurlong ha ka tie-breaker ki long u Lallianzuala Chhangte, Rahul Bheke bad u Jithin MS, katba ka jingpyrshah u Anwar Ali la shah khanglad noh bad u Udanta um shym la lah ban thep. Katba u Thani Al Rushaidi bad u Muhsen Al Ghassani ki la lah ban thep kol na ka bynta ka Oman, hynrei u Harib Al Saadi bad u Ahmed Al Kaabi kim shym la lah ban thep kol.
