Shillong, Nailur 08
Ka Meghalaya SSA School Association (MSSASA) kala pan jingpynshai na ka Sorkar Jylla halor ka hukum ba dang shen jong ka ïingbishar Supreme Court ba pynlong kongsan ïa baroh ki nonghikai ba kin pass ïa ka Teachers’ Eligibility Test (TET) hapoh arsnem.
La ong ba lada kim pass ïa ka TET, ka lah ban lam sha ka jinghap shongthait noh bad ïoh ïa ki jingmyntoi ba la pynkut kam.
“Kum ka kynhun ba don bynta ha ka kam pule dangle, ngi kwah ban sngewthuh ïa ka nongrim jong ka Sorkar Jylla halor kane ka hukum ka ïingbishar Supreme Court bad kumno yn pyntreikam ha Meghalaya,” ong ka MSSASA ha ka shithi ba la phah sha u Commissioner & Secretary ka tnat Education u Vijay Mantri ha ka sngi Nyngkong.
Ka Association kala pynpaw ba ka jingbtin lynti bad jingpynshai jong ka Sorkar kan ïarap shikatdei eh ban weng ïa ki jingsngewkhia jong ki nonghikai ha ka Jylla. La kyrpad ruh ïa ka Sorkar ba kan ai jubab da ka jingthoh ban pynthikna ba kala don ka jingïasyllok kaba janai bad ba ki nonghikai kin ïoh ïa ki jingtip bad jingkyrshan.
