Agartala, Nailur:
Ki shipai jong ka tnat Border Security Force (BSF) ha Tripura da ka jingjop ki la lah ban pynpulom ïa ki katto katne ki jingthmu ban khaïi tuh ha khappud Indo-Bangladesh, bad ki mar khaïi pateng kiba shongdor T. 10,28,193 la ïoh kurup.
Napdeng ki tiar ba la ïoh kurup ki long u dawai Phensedyl, u Ganja, bad ka shini Sugar, kaba pyni ba ki BSF ki ïai bteng ban ïakhun pyrshah ïa ki kam beaiñ ha katei ka thaiñ.
Katkum ki jingtip ba kyrpang, ki shipai BSF ki la pynduh pyndam ïa ka jingthmu ban khaïi tuh kaba jur ha ka thaiñ Digyabari jong ka West Tripura bad ki la ïoh kurup ïa ki jaiñ bad ki bom pynbthei kiba shongdor haduh T. 34,48,000. Kane ka jingkhynra ka la pyni ïa ka sienjam ba la shim da ki BSF pyrshah ïa ka jingkhaïi tuh ha khappud.
Ki kynhun ba la long adkar jong ka tnat shipai BSF ki la khanglad ïa ka jingthmu ban khaïi beaiñ kaba jur ha Border Out Post Ashabari ha Sepahijala distrik.
La ïoh kurup ïa ka shini kaba bun bad kiwei kiwei ki mar ba la khang pyrshah ban khaïi.
Kumjuh ruh u Ashwini Kumar Sharma, IG ka Tripura Frontier BSF ryngkat bad u DIG u Rajeev Vatsaraj ki la leit jngoh ïa ki BOP bapher bapher bad ki jaka khappud ha Kamalpur bad Kailasahar ban bishar bniah ïa ka jingpynkhreh treikam.
Ki shipai BSF kiba don ha BOP Gaurnagar ki la kem ïa lai ngut ki nong Bangladesh kiba thmu ban rung tuh sha India.
Ki briew kiba la shah kem ki la pynpaw ha ka jingtohkit ba ki don ki nongkhaïi India bad Bangladesh kiba donkti ban ïalam ïa ki sha shiliang ki bynta jong u pud u sam khamtam ha ka ban leh ïa ki kam beaiñ.
Na ka liang jong ki shipai ki la ïai bteng ban pynlong ïa ki jingkhynra sha ki shnong kiba don ha ki bynta khappud khnang ban lah ban tehlakam ïa ka jingkynrei jong ki kam khaïi ïa ki jingdih pynbuaid.
Ka bynta kaba hakhmat eh kaba ki kynhun shipai ki la pynlong ïa ka jingleit khynra ka long ban lap dien ïa ki nongkhaïi ïa ki jingdih pynbuaid bad ïa ki kynhun ba ki la ïatreilang khnang ban lah ban pynduh jait kum ïa kine ki jingleh beaiñ.
