Khliehriat, Nailur 08
Ka hat-trick ba la ïoh da u Karli Pakem ka la biang pura ïa ka Mokhain SC ban pynliem noh ïa ka Khaidong United da 7-0 kol na ka bynta ban khur jingjop ha ka 2nd Division Foot -ball Tournament ba la pynïaid da ka Saipung Block Sports Association (SBSA).
Kane ka lympung ïalehkai ka sdang naduh ka 6 tarik mynta u bnai ha madan Lamyrsiang ha kaba la plie ïa ka da u General Secretary SBSA u Bah Rimi Shadap ha ka jingdonlang lang u Bah Jimy Bareh, Auditor ka SBSA, kumjuh u Working President ka SBSA u Bah Teibor Suja nalor kiwei kiwei.
Haba phai sha ka jingïalehkai ha ka lah sngi U Blei, ka Mokhain ka la lah ban ïalehkai bha naduh kaba sdang ha kaba u Karli Pakem u la khur ïa katei ka hat-trick da kaba thep saw kol ha ka minit kaba 18, 27, 49 & 56, katba ïa kiwei pat la pynbud da u Leading Shadap (17 & 33), u Pynskhem Dkhar (35).
Ka jingïalehkai kaba bud hapdeng ka Sakwa SC bad Molasngi SC ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
Ha kawei pat ka jingïalehkai ka Moolamylliang SA&SC ka la pynliem noh ïa ka Bamkhosngi SC lyngba ka shi kol ba la thep da u Sudor Sutnga ha ka minit kaba 20.
